Yekîtiya Ewropayê dixwaze gihîştina zarokên di bin 13 salî de bo medyaya civakî sînordar bike; biryarek ku dikare rêbazên reklamê û Targetingê biguherîne
Yekîtiya Ewropayê li ser gaveke nû dixebite da ku gihîştina zarokan bo medyaya civakî sînordar bike. Li gorî rapora Financial Times a 10ê Îlona 2026an, Ursula von der Leyen, Seroka Komîsyona Ewropayê, amade ye ku pêşniyara danîna sînorekî nû yê temenî bo platformên dîjîtal pêşkêş bike.
Li gorî planê, zarokên di bin 13 salî de dê nikaribin medyaya civakî bi kar bînin, û bo ciwanên temenmezintir jî gihîştin dikare bi awayekî qonax bi qonax were rêxistin.
Sedema sereke ya vê gavê, fikarên li ser bandora medyaya civakî li zarokan e; bi taybetî dîzaynên ku dikarin bikarhêneran girêdayî bikin, lawaziya pergalên piştrastkirina temenî û bandora platforman li ser tenduristiya derûnî ya zarokan.
Komîsyona Ewropayê di Tîrmeha 2026an de bi awayekî destpêkî gihîşt wê encamê ku hin taybetmendiyên Facebook û Instagramê, wekî scrolla bêdawî, lîstina xweber a vîdyoyan û agahdarkirinên berdewam, dikarin metirsiya girêdayîbûnê zêde bikin.
Lê pirsgirêk tenê ew nîne ku zarok çend demjimêran li ser medyaya civakî derbas dikin. Komîsyona Ewropayê di Nîsana 2026an de bi awayekî destpêkî Meta bi wê yekê tawanbar kir ku rêbazên wê bo rêgirtin li zarokên di bin 13 salî de ji bo bikaranîna Facebook û Instagramê têrê nakin.
Li gorî Komîsyonê, zarok dikare dema çêkirina hesabê dîroka jidayikbûna şaş binivîse û bi vî awayî sînorê temenî derbas bike.
Lê ev mijar bo marketeran jî gelek girîng e.
Li Yekîtiya Ewropayê, Digital Services Act niha jî reklamên Targeted bo zarokan qedexe dike. Heke sînorê nû yê temenî were sepandin, platform dê neçar bibin pergalên naskirin û piştrastkirina temenê bikarhêneran bihêztir bikin. Ev jî dikare awayê gihîştina brandan bo bikarhênerên ciwan û awayê diyarkirina Audience biguherîne.
Bo platformên mezin wekî Facebook û Instagramê, ev tenê guhertineke biçûk a qanûnî nîne. Heke hejmareke berbiçav ji bikarhênerên ciwan were sînordarkirin, platform û brand dê neçar bibin ji nû ve bifikirin ka çawa dikarin bi awayekî qanûnî û exlaqî bi nifşê ciwan re têkilî daynin.
Ji aliyekî din ve, mijar bo Yekîtiya Ewropayê jî hêsan nîne. Hin welat, di nav de Fransa û Yewnanistan, piştgiriyê didin sînordarkirinên bihêztir. Lê li hin welatên bakur, navend û rojhilatê Ewropayê pirs hene ka gelo ev sînordarî bi rastî dikarin bên sepandin an na.
Ji ber vê yekê, girîng e bê zanîn ku ev hîn pêşniyar e û nebûye qanûneke dawî. Lê heke Yekîtiya Ewropayê vê rêbazê berdewam bike, dikare bandoreke mezin li ser pêşeroja medyaya civakî û marketinga dîjîtal bike.
Pirsa girîng bo marketeran ev e: Heke platform neçar bibin gihîştina zarok û ciwanan zêdetir sînordar bikin, brand dê di pêşerojê de çawa bikaribin xwe bigihînin nifşê ciwan, bêyî ku sînorên qanûnî û exlaqî derbas bikin?
