یەکێتییا ئەورووپایێ دڤێت دەستگەهشتنا زارۆکێن ژێر ١٣ سالی بۆ سۆشیال میدیایێ سنووردار بکەت؛ بریارەک کو دشێت یاسایێن ڕیکلام و Targeting بگوهۆڕیت
یەکێتییا ئەورووپایێ ل سەر هەنگاڤەکا نوو کار دکەت، دا کو دەستگەهشتنا زارۆکان بۆ سۆشیال میدیایێ سنووردار بکەت. ل دویڤ ڕاپۆرتەکا Financial Times ل ١٠ێ ئەیلوولا ٢٠٢٦، ئۆرسولا فۆن دێر لاین، سەرۆکا کۆمیسیۆنا ئەورووپایێ، ئامادەیە پێشنیارا دانانا سنورەکێ نوو یێ تەمەنی بۆ پلاتفۆرمێن دیجیتاڵ پێشکێش بکەت.
ل دویڤ پلانێ، زارۆکێن ژێر تەمەنی ١٣ سالی نەشێن سۆشیال میدیایێ بکاربینن، و بۆ هەرزەکارێن تەمەنمەزنتر ژی دەستگەهشتن دشێت قۆناغ ب قۆناغ بهێتە ڕێکخستن.
ئەگەر ئەڤ پلانە بهێتە جێبەجێکرن، دشێت بگوهۆڕینەکا گرنگ د شێوازێ کارکرنا پلاتفۆرمێن وەکی Facebook و Instagram دا دروست بکەت، ب تایبەتی د بابەتێ ناسینا تەمەنی بەکارهێنەران و پاراستنا زارۆکان دا.
هۆکارێ سەرەکی یێ ئەڤ هەنگاڤێ، نیگەرانییە ل سەر کاریگەرییا سۆشیال میدیایێ ل سەر زارۆکان؛ ب تایبەتی دیزاینێن کو دشێن بەکارهێنەران وابەستە بکەن، لاوازییا سیستەمێن پشتڕاستکرنا تەمەنی و کاریگەرییا پلاتفۆرمان ل سەر تەندروستییا دەروونی یا زارۆکان.
کۆمیسیۆنا ئەورووپایێ ل تەمموزا ٢٠٢٦ ب شێوەیەکێ سەرەتایی گەهشتییە وێ ئەنجامێ کو هندەک تایبەتمەندییێن Facebook و Instagram، وەکی سکرۆڵکرنا بێکۆتایی، لێدانا ئۆتۆماتیکی یا ڤیدیۆیان و ئاگەهدارکرنێن بەردەوام، دکارن مەترسییا وابەستەبوونێ زێدە بکەن.
بەلێ کێشە بتنێ ئەوە نینە کو زارۆک چەند دەمژمێران ل سەر سۆشیال میدیایێ دەرباز دکەن. کۆمیسیۆنا ئەورووپایێ ل نیسانا ٢٠٢٦ ب شێوەیەکێ سەرەتایی Meta ب وێ چەندێ تۆمەتبار کر کو ڕێکارێن وێ بۆ ڕێگرتن ل زارۆکێن ژێر ١٣ سالی ژ بەکارهێنانا Facebook و Instagram بەس نین.
ل دویڤ کۆمیسیۆنێ، زارۆک دشێت دەمێ هەژمارەکێ دروست دکەت، مێژوویا ژدایکبوونا خۆ ب هەڵە بنڤیسیت و ب ڤی شێوەیی سنورێ تەمەنی دەرباز بکەت.
بەلێ ئەڤ هەواڵە بۆ مارکێتەران ژی زۆر گرنگە.
ل یەکێتییا ئەورووپایێ، Digital Services Act ژ نوکە ڕیکلامێن Targeted بۆ زارۆکان قەدەغە دکەت. ئەگەر سنورێ نوو یێ تەمەنی ژی بهێتە جێبەجێکرن، پلاتفۆرم دێ ناچار بن سیستەمێن ناسین و پشتڕاستکرنا تەمەنی بەکارهێنەران بهێزتر بکەن.
ئەڤە ژی دشێت شێوازێ گەهشتنا براندان ب بەکارهێنەرێن گەنج بگوهۆڕیت و کاریگەرییێ ل سەر Audience Targeting و ستراتیژییێن ڕیکلامێ هەبیت.
بۆ پلاتفۆرمێن مەزن وەکی Facebook و Instagram، ئەڤە بتنێ گوهۆڕینەکا بچووک یا یاسایی نینە. ئەگەر ژمارەیەکا بەرچاڤ ژ بەکارهێنەرێن گەنج سنووردار ببن، پلاتفۆرم و براند دێ ناچار بن ژ نوو ڤە بیر بکەن کو چەوا دکارن ب شێوەیەکێ یاسایی و ئەخلاقی ب نەسلێ گەنج بگەهن.
ژ لایەکێ دی ڤە، ئەڤ بابەتە بۆ خودی یەکێتییا ئەورووپایێ ژی ب ساناهی نینە. هندەک وەلات، ژ وان فەرەنسا و یۆنان، پشتەڤانییا سنووردارکرنێن بهێزتر دکەن؛ بەلێ ل هندەک وەلاتێن دی یێن ئەورووپایێ پرسیار ل سەر وێ چەندێ هەیە کو ئەرێ ئەڤ سنووردارییە ب ڕاستی دکارن بهێنە جێبەجێکرن یان نە.
ژبەر هندێ، گرنگە بزانین کو ئەڤە هێشتا پێشنیارە و نەبوویە یاسایەکا کۆتایی. بەلێ ئەگەر یەکێتییا ئەورووپایێ ب ڤێ ئاراستەیێ بەردەوام بیت، دشێت کاریگەرییەکا مەزن ل سەر پاشەڕۆژا سۆشیال میدیایێ و مارکێتینگا دیجیتاڵ هەبیت.
پرسا گرنگ بۆ مارکێتەران ئەوەیە: ئەگەر پلاتفۆرم ناچار ببن دەستگەهشتنا زارۆک و هەرزەکاران زێدەتر سنووردار بکەن، براند دێ د پاشەڕۆژێ دا چەوا ب نەسلێ گەنج گەهن، بێی کو سنورێن یاسایی و ئەخلاقی دەرباز بکەن؟
