بتنێ بکارئینان تێرا ناکەت؛ بۆچی بتنێ ١٥٪ ژ مارکێتەران دشێن قازانجا AI بسەلمینن؟
«نۆکە کێشەیا مارکێتینگێ ئەڤە نینە کا ئەرێ ژیرییا دەستکرد بکاربینین یان نە، بەلکو پسیار ئەڤەیە: چاوا بسەلمینین کو بکارئینانا AI بهایەکێ ڕاستەقینە بۆ بزنسا مە دروست کرییە؟»
ژیرییا دەستکرد (AI) ئێدی نە بتنێ تەکنەلۆژیایەکا خەیالی یا پاشەڕۆژێ یە بۆ مارکێتەران؛ بەلکو بوویە بەشەکێ ژێڤەنەبووی د کارێ وان یێ ڕۆژانە دا. ل گۆرەی ڕاپۆرتا سالانە یا مارکێتینگێ یا (Nielsen) بۆ سالا ٢٠٢٦ێ، ڕێژەیا ٩٨٪ ژ مارکێتەران AI د کارێن خۆ دا بکار دئینن. ژ شڕۆڤەکرنا داتایان و پێڤانا ئەنجامان بگرە، تا دگەهیتە دروستکرنا ناڤەڕۆکێ (Creative)، پلاندانانا میدیایێ و پێشبینیکرنا پاشەڕۆژێ.
لێ ل پاڵ ڤێ ڕێژەیا بەرز، هژمارەکا دی هەیە کو چیرۆکێ گەلەک سەرنجڕاکێشتر دکەت: بتنێ ١٥٪ ژ مارکێتەران دشێن خەرجییێن خۆ د دیتن و بکارئینانا AI دا ب قازانجا زڤڕی (ROI - Return on Investment) ڤە گرێبدەن.
داتایێن (Nielsen) دیار دکەن کو نێزیکی ٦٨٪ ژ مارکێتەران AI بۆ پێڤان و شڕۆڤەکرنێ (Measurement & Analytics) بکار دئینن، زێدەتر ژ سێ ل سەر پێنجان بۆ دروستکرنا ناڤەڕۆکێ و پلاندانان و باشترکرنا میدیایێ، و ٥٧٪ ژی بۆ پێشبینیکرنا پاشەڕۆژێ (Predictive Forecasting) بکار دئینن. ئەڤە ژی ب وێ ڕامانێ یە کو AI ب لەزاتییەکا زۆر خەریکە دچیتە ناڤ تەمامییا زنجیرەیا مارکێتینگێ ڤە.
وانەیا گرنگ بۆ مارکێتەران چییە؟ وانە ئەڤەیە: بکارئینانا ژیرییا دەستکرد ئێدی ب تنێ "خالا جوداکەر و بالادەستییا هەڤڕکییێ" (Competitive Advantage) نینە.
دەمێ نێزیکی هەمیان (٩٨٪) AI بکار دئینن، جوداهییا ڕاستەقینە یا د ناڤبەرا براندان دا د وێ یەکێ دا دەردکەڤیت کا کێ دشێت ڤێ تەکنەلۆژیایێ ب شێوەیەکێ باشتر، زیرەکانەتر و ب ئەنجامەکێ پێڤانکریتر بکاربینیت.
د قۆناغا ئێکێ دا، خەما سەرەکی یا هەمیان ئەڤە بوو: «چاوا AI بکاربینین؟» لێ نۆکە، قۆناغا داهاتی و گرنگتر دەست پێدکەت کو پسیارا وێ ئەڤەیە: «چاوا بسەلمینین کو AI بهای دروست دکەت و قازانجێ دئینیت؟»
