دوماهییا سەردەمەکی؛ بۆچی McDonald’s پشتی ٣٢ سالێن گرێبەستێ، سپۆنسەرییا خۆ دگەل مۆندیالێ هەلوەشاند؟
«پشتی ٣٢ سالان ژ هەڤپشکییەکا مێژوویی، کۆمپانییا McDonald’s بڕیار دا دوماهییێ ب سپۆنسەرییا خۆ بۆ جاما جیهانییا فیفا (FIFA World Cup) بینیت؛ بڕیارەک کو ڕەنگە نیشانا گوهۆڕینەکا گەلەک مەزنتر بیت د ستراتیژییا مارکێتینگا براندێن جیهانی دا.»
خالا سەرنجڕاکێش ئەڤەیە کو د مۆندیالا ٢٠٢٦ێ دا، McDonald’s مەزنترین کەمپینا مێژوویا خۆ بۆ جاما جیهانی بڕێڤەبر، کو زێدەتر ژ ١١٠ وەلاتان ڤەگرت. لێ ئیان بۆردن (Ian Borden)، بەرپرسێ دارایی یێ کۆمپانیایێ، ڕاگەهاند؛ هەرچەندە کەمپینێ وزەیەکا باش دروست کر و هاریکارییا بزنسێ کر، لێ ئەنجامێ وێ ل ئاستێ چاڤەڕێکرنا کۆمپانیایێ نەبوو.
ئەڤە ژی پسیارەکا ستراتیژی بۆ پاشەڕۆژا مارکێتینگا وەرزشی (Sports Marketing) دروست دکەت: ئەرێ سپۆنسەرییێن زەبەلاح و گرانبها هێشتا هەمان بهایێ بەرێ بۆ براندان مایە؟
مۆندیالا ٢٠٢٦ێ ب تنێ زێدەتر ژ ١٠ ملیار دۆلارێن خەرجییا ڕیکلاما جیهانی ڕاکێشا، ل گەل ٢.٨ ملیار دۆلار کو فیفایێ ژ ٢٠ سپۆنسەرێن فەرمی وەرگرت. د ڤی ژینگەهێ قەرەبالغ دا، براندان پێشبڕکێ دکر ل گەل ب هزاران پەیامێن دی بۆ ڕاکێشانا هەمان سەرنجێ. نۆکە McDonald’s ئاراستەیێ مۆدێلا مارکێتینگا خۆ دگۆهۆڕیت و زێدەتر سەرنجێ دئێخیتە سەر پلاتفۆرمان و خوداندارییا فکری یا خۆ (Intellectual Property)، ئانکو وەبەرهێنان د تشتەکی دا کو ب خۆ خودان بیت و کۆنترۆلا تەمام ل سەر هەبیت.
وانە بۆ مارکێتەران چییە؟ وانە گەلەک یا ڕوونە: مەزنترین ڕووداو (Event) هەردەم ب رامانا مەزنترین قازانج (Return) ناهێت.
د سەردەمێ ئابوورییا دروستکەران دا (Creator Economy)، سۆشیاڵ میدیا و مارکێتینگا پشت‌بەستای ب ئەنجامان (Performance Marketing)، پسیارا براندان ئێدی نە بتنێ ئەڤەیە کو «چەند ملیۆن کەس دێ ڕیکلاما مە بینن؟». بەلکو پسیارا هەرە گرنگ ئەڤەیە: «ئەو سەرنجە چ بهایەکێ ڕاستەقینە بۆ براند و بزنسا مە دروست دکەت؟»
