بکارئینانا میوزیکێن ترێند ل سەر ئینستاگرام و تیکتۆکێ، دبیت باجەکا گران ب دووڤ خۆ ڕە بینیت! چیرۆکا کێشا یاسایی یا سۆنی میوزیک و کرۆگەر چ وانەکا گرنگ ددەتە خودانێن براندان؟
د ٢١ێ تەباخا ٢٠٢٦ێ دا، Sony Music Entertainment ل دادگەها فیدرالی یا دەڤەرا ناڤەندی یا کالیفۆرنیا سکالایەک ل دژی Kroger و چەندین کۆمپانیێن پەیوەندیدار تۆمار کر. سۆنی بانگەشەیا وێ چەندێ دکەت کو لایێ کێم ٣٩٢ جاران تۆمارێن میوزیکی یێن پاراستی بێی مۆلەت د ڕیکلامێن سۆشیال میدیایێ دا هاتینە بکارئینان، د ناڤ وان ژی دا ڤیدیۆیێن هەژمارێن خودی براندان و هندەک ئینفلۆنسەران کو پارە وەرگرتینە بۆ ڕیکلامکرنێ. هێشتا ئەڤە بانگەشەیێن سۆنی میوزیکن، نە بڕیارا دوماهیێ یا دادگەهێ یە.
گرنگیا ڤێ نۆچەیی بۆ مارکێتەران ل ڤێرێ یە: هەبوونا سترانەکێ ل TikTok یان Instagramێ ب وێ ڕامانێ نینە کو براندەک دشێت ب ئازادی د ناڤەرۆکا بازرگانی و ڕیکلامێ دا بکاربینیت. مافێ بکارئینانا میوزیکێ د ڕیکلامێ دا بابەتەکێ جودایە و د گەلەک حالەتان دا پێدڤی ب مۆلەتەکا گونجای هەیە. تەنانەت سۆنی بانگەشە دکەت کو کرۆگەر بەری نوکە، د ناڤبەرا ٢٠١٧ تا ٢٠٢٥ێ دا، لایێ کێم ١٤ مۆلەت ژ سۆنی وەرگرتینە بۆ بکارئینانا تۆمارێن وێ د ڕیکلامان دا.
کێشە ب تنێ ب پۆستێن خودی براندی ب دوماهی ناهێت. سکالا ڤیدیۆیێن ئینفلۆنسەرێن پارە وەرگرتی ژی ب خۆ ڤە دگریت، ئانکو ئەگەر براندەک کەمپینەکا Influencer Marketing بڕێڤە ببەت، بکارئینانا میوزیکا بێ مۆلەت ژ لایێ ئینفلۆنسەری ڤە دشێت مەترسیەکا یاسایی بۆ کەمپینێ دروست بکەت. سۆنی داخوازا قەرەبۆییا یاسایی و ڕاگرتنا بکارئینانا تۆماران دکەت و بانگەشەیا پێشێلکرنا ڕاستەوخۆ، هەڤپشک و ب وەکالەت (نیابەتی) کریە.
وانە بۆ براندان یا ڕوونە: بەری بکارئینانا سترانەکێ د ڤیدیۆیەکا بازرگانی دا، ب تنێ ل وێ چەندێ نەگەڕن کا د سۆشیال میدیایێ دا ل بەر دەستە یان نە؛ ل وێ چەندێ بگەڕن کا مافێ بکارئینانا بازرگانی بۆ وێ میوزیکێ هەیە یان نە. ئەو سترانا کو ب ئێك کلیک دهێتە دانان ل سەر ڤیدیۆیێ، ب ئێك کلیک نابیتە میوزیکا مۆلەتدای بۆ ڕیکلامێ.
