ChatGPT دەیەوێت هێزی Google و Meta لە یەک پلاتفۆرمی ڕیکلامدا کۆبکاتەوە؛ OpenAI ئامادەکاری بۆ قۆناغێکی نوێی ChatGPT Ads دەکات
OpenAI ئامانجێکی گەورەی بۆ داهاتووی ڕیکلام لە ChatGPT هەیە؛ دروستکردنی پلاتفۆرمێک کە هێزی Google لە تێگەیشتن لە مەبەستی کڕیار لەگەڵ هێزی Meta لە ناسینی کۆنتێکست و ئارەزووی بەکارهێنەر کۆبکاتەوە.
Sarah Friar، CFO ـی OpenAI، لە کۆنفرانسی Goldman Sachs لە San Francisco وتوویەتی بیرۆکەی ChatGPT Ads دەتوانرێت بە شێوەیەکی سادە وەسف بکرێت: وەک ئەوەی Google و Meta پێکەوە پلاتفۆرمێکی ڕیکلامیان دروست کردبێت.
هۆکارەکە ئەوەیە Google لە ڕیکلامدا هێزێکی گەورەی هەیە، چونکە کاتێک کەسێک شتێک دەگەڕێت، زۆرجار مەبەستەکەی ڕوونە. بۆ نموونە، کەسێک دەگەڕێت بەدوای «باشترین مۆبایل بۆ کڕین»، ئەمە نیشانەیەکی بەهێزە کە لە قۆناغی بیرکردنەوە لە کڕیندایە.
Meta لە لایەکی ترەوە، بەهۆی Facebook و Instagram، توانایەکی گەورەی لە تێگەیشتن لە ئارەزوو و کۆنتێکستی بەکارهێنەران هەیە.
OpenAI دەیەوێت ChatGPT ئەم دوو هێزە پێکەوە کۆبکاتەوە. ChatGPT دەتوانێت لە کۆنتێکستی گفتوگۆی ئێستا تێبگات کە بەکارهێنەر چی دەوێت و لە چ قۆناغێکی بڕیارداندایە. لە هەندێک ناوچە و بە پێی ڕێکخستنەکانی بەکارهێنەر، سیگناڵەکانی دیکەی ئەزموونی ChatGPT ـیش دەتوانن بۆ پەیوەندیدارترکردنی ڕیکلام بەکاربهێنرێن.
بۆ نموونە، کەسێک لە ChatGPT دەربارەی جیاوازی نێوان دوو جۆری کامێرا پرسیار دەکات، نرخ و تایبەتمەندییەکانیان بەراورد دەکات و دواتر دەپرسیێت کامیان بۆ کاری ئەو باشترە. ئەمە تەنها «گەڕان» نییە؛ گفتوگۆیەکە دەتوانێت نیشان بدات کە کەسەکە خەریکە بڕیارێکی کڕین دەدات. بۆ مارکێتەر، ئەو ساتە زێڕە، چونکە مرۆڤەکان بە شێوەیەکی سەیر زۆرترین نرخ هەر بۆ ساتی بڕیاردانی مرۆڤێکی تر دەدەن.
ئەمە لە کاتێکدایە کە ChatGPT Ads بە خێرایی گەشە دەکات. OpenAI لە ٣١ی ئابی ٢٠٢٦ ڕایگەیاند کە کاروباری ڕیکلامەکەی لە کەمتر لە ٢٠٠ ڕۆژدا گەیشتووەتە ١ ملیار دۆلار annualized revenue run rate و دەیان هەزار ڕیکلامکەر پلاتفۆرمەکە بەکاردەهێنن. ئەو ١ ملیار دۆلارە واتای ئەوە نییە OpenAI تا ئێستا ١ ملیار دۆلاری کۆکردووەتەوە؛ واتە ئەگەر ئاستی داهاتی ئێستای بەردەوام بێت، بە نرخێکی ساڵانە نزیکەی ئەو ئاستە دەبێت.
بەڵام OpenAI دەڵێت ئەو ڕیکلامانەی ئێستا دەبینرێن هێشتا سەرەتایین. Friar ئاماژەی بەوە کردووە کە تیمەکە کار لەسەر فۆرماتی ڕیکلامی پێشکەوتووتر و تایبەت بە ژینگەی AI دەکات، واتە فۆرماتێک کە تەنها کۆپی ڕیکلامی Google یان سۆشیال میدیا نەبێت، بەڵکوو بۆ سروشتی گفتوگۆ لەگەڵ AI دروست کرابێت.
OpenAI پێشتر Ads Manager، ڕیکلامی CPC، پێوانەکردنی conversion و ئامرازەکانی ئۆپتیمایزکردنی ئەنجامی کەمپینی زیاد کردووە. کۆمپانیاکە دەڵێت ئامانجی درێژخایەنی ئەوەیە فۆرمات، ئامانج و توانای زیاتر بۆ ڕیکلامکەران زیاد بکات.
خاڵێکی گرنگیش هەیە: ڕیکلامەکان نابێت کاریگەری لە وەڵامەکانی ChatGPT بکەن. بەپێی سیاسەتی فەرمی OpenAI، ڕیکلام لە وەڵامی ChatGPT جیاکراوەتەوە و بە ڕوونی وەک sponsored دیاری دەکرێت. هەروەها OpenAI دەڵێت گفتوگۆکانی بەکارهێنەران بە ڕیکلامکەران نادات و داتای کەسی بە ڕیکلامکەران نافرۆشێت.
بۆ مارکێتەرەکان، پرسیاری گەورە ئێستا ئەوەیە: ئەگەر Google شوێنی گەڕان بێت و Meta شوێنی دۆزینەوە و سەرنج، ئایا ChatGPT دەتوانێت ببێتە شوێنی سێیەم، واتە ئەو شوێنەی کڕیار تێیدا گفتوگۆ دەکات، بەراورد دەکات و بڕیاری کڕین دەدات؟
هێشتا زووە بڵێین ChatGPT بووەتە ڕکابەرێکی هاوتای Google و Meta لە بازاڕی ڕیکلام. بەڵام ئاراستەکە ڕوونتر بووەتەوە: OpenAI تەنها ڕیکلام لە ChatGPT زیاد ناکات؛ خەریکە بناغەی پلاتفۆرمێکی تەواوی ڕیکلام دروست دەکات.
