
لە بیابانی وشکەوە بۆ شێدارکردنی پێست؛ چۆن فیلمی Dune بووەتە ئیلهامبەخشی هەڵمەتێکی زیرەکانە بۆ براندی CeraVe؟
فیلمی سینەمایی Dune: Part Three، کە بڕیارە لە ١٨ی دیسەمبەری ئەمساڵ نمایش بکرێت، هاوبەشییەکی ستراتیژیی لەگەڵ براندی بەرهەمەکانی چاودێریی پێست، سێراڤی (CeraVe)، دروست کردووە. بەڵام ئەم دووانە چ پەیوەندییەکیان بە یەکترەوە هەیە؟ لە جیهانی فیلمی دون (Dune)دا، هەسارەیەک هەیە بە ناوی ئاراکیس (Arrakis)، کە بیابانێکی زۆر وشکە و ئاو تێیدا زۆر بەهادارە. لە لایەکی ترەوە، سێراڤی کرێمی شێدارکردنی پێست دەفرۆشێت. کۆمپانیاکە ئەم دوو بیرۆکەیەی بە یەکترەوە بەستووەتەوە و هەڵمەتێکی هاوبەشی دروست کردووە. لە یەکێک لە ڤیدیۆکانی هەڵمەتەکەدا، لە ناو بیابانەکەدا چاوەڕێ دەکەیت بوونەوەرێکی گەورەی فیلمەکە لە ژێر لمەکەوە دەربکەوێت، بەڵام لەبری ئەوە، قووتوویەکی کرێمی سێراڤی دەردەکەوێت! ئەمەش بە شێوەیەکی تەنزئامێز پەیوەندیی نێوان وشکبوونی بیابان و پێویستیی پێست بە شێداربوون نیشان دەدات. بەڵام وانەی بەبازاڕکردنی ئەم هەواڵە چییە؟ لەبری ئەوەی سێراڤی تەنها بڵێت «کرێمەکەمان پێست شێدار دەکات»، بەرهەمەکەی دەباتە ناو جیهانی فیلمێکی ناسراو. بەم شێوەیە، هەوڵ دەدات سەرنجی هەوادارانی سینەما بۆ بەرهەمەکەی ڕابکێشێت. لە هەمان کاتدا، هاوبەشییەکە دەتوانێت ببێتە هۆی ئەوەی خەڵکێکی زیاتر باسی فیلمە نوێیەکە بکەن. یان بە یەک حوکمی کورت: «لە بەبازاڕکردنی سینەمادا، هاوبەشییەکی سەرکەوتوو تەنها دانانی ناوی فیلمێک نییە لەسەر بەرهەمێک؛ بەڵکو گرنگە پەیوەندییەکی مانادار لە نێوان چیرۆکی فیلمەکە و بەرهەمەکەدا هەبێت.»













