کارمەند خەریکن دبنە Creator ـێن نوو یێن براندان؛ ٤٠٪ ژ کڕیاران هەر هەیڤ ب ڕێکا ناڤەرۆکا کارمەندان بەرهەم و خزمەتگوزاریێن نوو ددۆزنەڤە
ڕۆلێ کارمەندان د کۆمپانیان دا خەریکە دهێتە گوهۆڕین. کارمەند ئێدی بتنێ ئەو کەسە نینە کو ل پشت پەردەیێ بۆ براندەکێ کار بکەت؛ د هندەک کۆمپانیان دا، کارمەند ب خۆ دبیتە Creator و دەنگێ براندی ل سۆشیال میدیایێ.
ڕاپۆرتا Sprout Social نیشان ددەت کو ٤٠٪ ژ بەکارهێنەران هەر هەیڤ ب ڕێکا ناڤەرۆکا هاتییە دروستکرن ژ لایێ کارمەندێن کۆمپانیان ڤە، بەرهەم یان خزمەتگوزارییەکا نوو ددۆزنەڤە. د ناڤ Gen Z دا ئەڤ ڕێژە هێشتا بلندترە و دگەهیتە ٦١٪.
ئەڤ ڕەوتە ب ناڤێ Employee-Generated Content (EGC) دهێتە ناسین. واتە ناڤەرۆکا کو کارمەندێن خودی کۆمپانیایێ دەربارەی بەرهەم، خزمەتگوزاری، ژینگەها کاری یان ئەزموونا خۆ دروست دکەن.
بۆ نموونە، ل جهێ کو چێشتخانەیەک بتنێ ڕیکلامەکا پیشەیی بەلاڤ بکەتەڤە، ئاشپێژەکێ وێ دشێت ڤیدیۆیەکێ ل سەر چاوانیا ئامادەکرنا خوارنێ دروست بکەت. یان کارمەندەکێ فرۆشگەها جل و بەرگان دشێت ب شێوازێ خۆ نیشان بدەت کو بەرهەمێن نوو چاوا دهێنە بکارئینان.
هۆکارێ بەهێزبوونا ڤی جورێ ناڤەرۆکێ ژی سادەیە: خەلک دڤێن مرۆڤێن ڕاستەقینە ببینن. Sprout Social دبێژیت بەکارهێنەر دەنگێ کارمەندان ڕاستگۆیانەتر و باوەرپێکریتر ژ ناڤەرۆکا زۆر ڕازاندی یا ئەکاونتێن فەرمی یێن براندان دبینن.
هندەک براندێن مەزن ژی دەست ب ڤێ ستراتیژییێ کرینە. Gap Inc. بەرنامەیا Creator یا خۆ بۆ کارمەندێن Gap، Old Navy، Athleta و Banana Republic ڤەکرییە، دا کو ناڤەرۆکێ دروست بکەن و ب ڕێکا affiliate link کۆمسیۆنێ وەربگرن. Starbucks ژی ب بەرنامەیا Green Apron Creators پشتگیرییا کارمەندێن خۆ یێن Creator دکەت.
ئەنجام ژی سەرنجڕاکێشن. Gap دبێژیت بەرنامەیا وێ د سالا ئێکێ دا نێزیکی ٣٠ هزار ناڤەرۆکێن جیاواز بەرهەم ئیناینە و ب گشتی گەهشتینە ١٥٤ ملیۆن کەسان.
بەلێ بابەت بتنێ ئەوە نینە کو «کارمەند ڤیدیۆیان دروست بکەن». دەمێ کۆمپانی ب شێوەیەکێ فەرمی کارمەندێن خۆ بۆ پڕۆمۆتکرنا براندی بکار دئینیت، بابەتێ پارەدانێ و مافێن کارمەندان ژی دئێتە پێش. د ڕاپۆرتا Sprout Social دا، ٦١٪ ژ بەکارهێنەران پێیان وایە کۆمپانی دڤێت پارەیێ زێدە بدەن ئەو کارمەندێن کو ناڤەرۆکا پڕۆمۆشنێ بۆ براندی دروست دکەن.
بۆ مارکێتەران، پەیاما سەرەکی ڕوونە: دبیت باشترین Creator بۆ براندێ تە هەردەم ئەو کەسە نەبیت کو ملیۆنەک follower هەبیت؛ دبیت ئەو کارمەندە بیت کو هەر ڕۆژ دگەل بەرهەمێ تە کار دکەت و دشێت ب زمانەکێ ڕاستەقینە چیرۆکا وێ بۆ خەلکی بگێڕیتەڤە.
