
پارادۆکسا ژیرییا دەستکرد؛ بۆچی بکارئینانا تەکنەلۆژیایێ وەنەکرییە بودجەیێ بەبازاڕکرنێ کێم ببیت؟
ئەرێ بکارئینانا ژیرییا دەستکرد د بەبازاڕکرنێ دا هەردەم دبیتە ئەگەرێ کێمبوونا خەرجییان؟ ڤەکۆلینەکا نوی یا کۆمپانیایا 10Fold، کو ل ١٧ێ نۆڤەمبەرێ هاتییە بەلاڤکرن، ڤێ پسیارێ دئێخیتە ڕوو. د ڤەکۆلینێ دا، ڕاپرسی ل گەل ٤٠٠ بڕێڤەبەرێن بەبازاڕکرنێ یێن کۆمپانیایێن تەکنەلۆژی ل ئەمریکا و سێ وەلاتێن ئەورووپی هاتییە کرن. ئەنجام د بالکێشن. ٨٠٪ ژ پشکداران چاڤەڕێ دکەن بودجەیێ وان یێ بەبازاڕکرنێ د سالا ٢٠٢٧ێ دا بهێتە زێدەکرن. لێ بۆچی، دەمێ ژیرییا دەستکرد دشێت هندەک کاران ب لەزتر و ئەرزانتر بکەت؟ ل گۆرەی ڕاپرسییێ، نیڤا پشکداران دبێژن ژیرییا دەستکرد خەرجییێن کارێن بەبازاڕکرنێ کێم کرینە. لێ ٣٤٪ ژ وان دبێژن خەرجییێن وان زێدە بووینە، چونکی بکارئینانا ژیرییا دەستکرد خەرجییێن نوی یێن هەین؛ وەکی کڕینا نەرمەکاران (سۆفتوێر)، ڕاهێنانا فەرمانبەران و چاڤدێرییا مرۆڤی. خالەکا دی یا بالکێش ئەڤەیە کو ٤٢٪ ژ پشکداران پلانا زێدەکرنا فەرمانبەران یا هەی و ٣٦٪ ژ وان دخوازن بودجەیێ ئاژانسێن بەبازاڕکرنێ زێدە بکەن. ئەڤ ئەنجامە نیشان ددەن کو ژیرییا دەستکرد، لایێ کێم د ناڤ ڤان کۆمپانیایان دا، ب شێوەیەکێ یەکسان خەرجی کێم نەکرییە. یان ب ئێک حوکمێ کورت: «ژیرییا دەستکرد دشێت کاران ب لەزتر بکەت، لێ ب لەزترکرنا کاری هەردەم ب ڕامانا کێمکرنا کۆما خەرجییان نینە؛ بەلکو گەلەک جاران پێدڤی ب وەبەرهێنانەکا زێدەترە بۆ ب دەستڤەئینانا دەرفەتێن نوی.»













