AI êdî tenê amûrekî marketingê nîne; di sala 2026an de nêzîkî 12% ji lêçûnên reklamê yên Amerîkayê bi pergalên otomatîk û AI têne birêvebirin
Guhertineke mezin di bazara reklamê de pêk tê. Zîrekiya destçêkirî êdî tenê ji bo nivîsandina naverokê, çêkirina wêneyan an analîzkirina daneyan nayê bikaranîn; lê belê, hêdî hêdî beşeke mezintir ji biryarên derbarê birêvebirin û xerckirina budceya reklamê de jî digire dest.
IAB di pêşbîniya xwe ya herî nû ji bo sala 2026an de, pêşbîniya mezinbûna lêçûnên reklamê li Amerîkayê ji 9.5% derxistiye 12.3%. Di heman demê de, pêşbîniya Madison & Wall nîşan dide ku di sala 2026an de nêzîkî 12% ji lêçûnên reklamê yên Amerîkayê dê bi kampanyayên otomatîk û pergalên AI bên birêvebirin. Ev rêje di sala 2023an de tenê 2% bû. Yanî di nav sê salan de, ev rêje nêzîkî şeş qat zêde bûye.
Lê ev tê çi wateyê?
Di şêwaza kevn a reklamê de, marketer bi xwe beşeke mezin ji biryarên kampanyayê dida: Kî reklama me bibîne? Çiqas pere ji bo her komekê bê xerckirin? Reklam li ku derê bê nîşandan? Û budce çawa bê dabeşkirin?
Niha ev şêwaz diguhere.
Pergalên wek Google Performance Max, AI Max û Meta Advantage+ dikarin beşeke mezin ji van biryaran bi awayekî otomatîk bidin. Marketer armanc, budce û daneyên kampanyayê diyar dike, paşê pergal bi alîkariya AI hewl dide biryar bide ku reklam ji kê re, li ku derê û di çi demê de bê nîşandan û budce çawa bê xerckirin da ku encama herî baş bê bidestxistin.
Ev araste tenê li Google û Meta nayê dîtin. TikTok, Reddit û Pinterest jî cureyên cuda yên kampanyayên otomatîk pêşkêş dikin. Li gorî daneyên Tinuiti, di nav mişteriyên Retail ên vê şirketê de, Performance Max ji dawiya sala 2025an ve nêzîkî 60% heta 70% ji lêçûnên reklamê pêk aniye.
Pêşbînî nîşan didin ku ev tenê destpêka guhertinê ye. Madison & Wall pêşbînî dike ku heta sala 2030î, lêçûnên reklamê yên ku AI wan araste dike, bigihîjin nêzîkî 158 milyar dolarî. Ev jî nêzîkî 27% ji tevahiya bazara reklamê ya Amerîkayê ye.
Ev guhertin dikare rola marketeran jî biguherîne. Li şûna ku piraniya dema xwe ji bo guhertina Bid, hilbijartina Audience û dabeşkirina budceyê bi destî derbas bikin, rola marketeran dê zêdetir li ser stratejiyê, diyarkirina armancên rast, peydakirina daneyên baş, çêkirina Creative-a bihêz û çavdêriya biryarên AI bisekine.
Lê ev nayê wê wateyê ku êdî pêdivî bi marketeran tune ye. Berevajî, dema ku AI beşeke mezintir ji biryarên kampanyayê digire dest, pirseke girîngtir derdikeve holê: Kî dê çavdêriya biryarên AI bike?
AI dikare li gorî dane û armancên ku jê re hatine diyarkirin budceyê birêve bibe, lê hîn jî mirov e ku divê diyar bike armanc çi ye, kîjan dane rast in û kîjan encam bi rastî ji bo karsaziyê bi nirx e.
Ji ber vê yekê, guhertina mezin ne ew e ku AI hatiye nav marketingê; ew qonax derbas bûye. Guhertina rastîn ew e ku AI ji amûrekî alîkar hêdî hêdî vediguhere pergalekê ku bi xwe beşek ji biryarên xerckirina budceya reklamê dide.
Ji bo marketeran jî pirs êdî ne ev e ku «Em AI bi kar bînin an na?» Pirsa nû ev e: Dema ku AI bi xwe biryar dide budce li ku derê û çawa bê xerckirin, rola mirov di birêvebirina reklamê de dê çi be?
