AI چیتر تەنها ئامرازێکی مارکێتینگ نییە؛ لە ٢٠٢٦ نزیکەی ١٢٪ی خەرجی ڕیکلامی ئەمریکا لە ڕێگەی سیستەمە ئۆتۆماتیکی و AI ـەکانەوە بەڕێوە دەبرێت
گۆڕانکارییەکی گەورە لە بازاڕی ڕیکلامدا خەریکە ڕوودەدات. زیرەکی دەستکرد چیتر تەنها بۆ نووسینی دەق، دروستکردنی وێنە یان شیکردنەوەی داتا بەکارناهێنرێت؛ بەڵکو خەریکە بەشێکی گەورەتر لە بڕیارەکانی بەڕێوەبردن و خەرجکردنی بودجەی ڕیکلام دەگرێتە دەست.
IAB لە نوێترین پێشبینیی خۆیدا بۆ ساڵی ٢٠٢٦، پێشبینیی گەشەی خەرجی ڕیکلام لە ئەمریکا لە ٩.٥٪ بۆ ١٢.٣٪ بەرز کردووەتەوە. لە هەمان کاتدا، پێشبینیی Madison & Wall نیشان دەدات نزیکەی ١٢٪ی خەرجی ڕیکلامی ئەمریکا ئەمساڵ لە ڕێگەی کەمپینە ئۆتۆماتیکی و سیستەمەکانی AI ـەوە بەڕێوە دەبرێت. ئەو ڕێژەیە لە ساڵی ٢٠٢٣ تەنها ٢٪ بوو؛ واتە لە ماوەی سێ ساڵدا نزیکەی شەش هێندە بووە.
بەڵام ئەمە بە مانای چییە؟
لە شێوازی کۆنی ڕیکلامدا، مارکێتەر خۆی بەشێکی زۆر لە بڕیارەکانی کەمپین دەیدا: کێ ڕیکلامەکە ببینێت؟ چەند پارە بۆ هەر گرووپێک خەرج بکرێت؟ ڕیکلامەکە لە کوێ پیشان بدرێت؟ و بودجەکە چۆن دابەش بکرێت؟
ئێستا ئەم شێوازە خەریکە دەگۆڕێت.
سیستەمەکانی وەک Google Performance Max و AI Max و Meta Advantage+ دەتوانن بەشێکی زۆر لەم بڕیارانە بە شێوەی ئۆتۆماتیکی ئەنجام بدەن. مارکێتەر ئامانج، بودجە و داتاکانی کەمپین دیاری دەکات، پاشان سیستەمەکە بە پشتبەستن بە AI هەوڵ دەدات بڕیار بدات ڕیکلامەکە بۆ کێ پیشان بدرێت، لە کوێ پیشان بدرێت و بودجەکە چۆن خەرج بکرێت بۆ ئەوەی باشترین ئەنجام بەدەستبهێنرێت.
ئەم ئاراستەیە تەنها لە Google و Meta نابینرێت. TikTok، Reddit و Pinterest ـیش کەمپینی ئۆتۆماتیکییان پێشکەش کردووە. هەروەها بەپێی داتای Tinuiti، لە نێو کڕیارە Retail ـەکانی ئەو کۆمپانیایەدا، Performance Max لە کۆتایی ٢٠٢٥ەوە ٦٠٪ تا ٧٠٪ی خەرجی ڕیکلامیان پێکهێناوە.
پێشبینییەکان نیشان دەدەن ئەمە تەنها سەرەتای گۆڕانکارییەکەیە. Madison & Wall پێشبینی دەکات تا ساڵی ٢٠٣٠، خەرجی ڕیکلام کە لەلایەن AI ـەوە ئاراستە دەکرێت بگاتە نزیکەی ١٥٨ ملیار دۆلار، کە نزیکەی ٢٧٪ی بازاڕی ڕیکلامی ئەمریکا پێکدەهێنێت.
ئەمە ڕۆڵی مارکێتەر دەگۆڕێت. لەبری ئەوەی زۆربەی کات بۆ گۆڕینی Bid، هەڵبژاردنی Audience و دابەشکردنی دەستیی بودجە خەرج بکات، کاری مارکێتەر زیاتر دەچێتە سەر دانانی ستراتیژی، دیاریکردنی ئامانجی دروست، دابینکردنی داتای باش، دروستکردنی Creative ـی بەهێز و چاودێریکردنی بڕیارەکانی AI.
بەڵام ئەمە بە هیچ شێوەیەک واتای ئەوە نییە کە مارکێتەر چیتر پێویست نییە. بە پێچەوانەوە، کاتێک AI بەشێکی زیاتر لە بڕیارەکانی کەمپین دەگرێتە دەست، پرسیارێکی گرنگتر دروست دەبێت: کێ چاودێری بڕیارەکانی AI دەکات؟
چونکە AI دەتوانێت بەپێی داتا و ئامانجی پێدراو بودجەکە بەڕێوە ببات، بەڵام هێشتا مرۆڤە کە دەبێت دیاری بکات ئامانجەکە چییە، کام داتا دروستە و کام ئەنجام بەڕاستی بۆ کاروبار بە نرخە.
بۆیە گۆڕانکاریی گەورەکە ئەوە نییە کە AI هاتووەتە ناو مارکێتینگ؛ ئەو قۆناغە تێپەڕیوە. گۆڕانکاریی ڕاستەقینە ئەوەیە کە AI خەریکە لە ئامرازێکی یارمەتیدەرەوە دەگۆڕێت بۆ سیستەمێک کە بەشێک لە بڕیارەکانی خەرجکردنی بودجەی ڕیکلام خۆی دەدات.
بۆ مارکێتەرانیش پرسیارەکە چیتر ئەوە نییە کە «ئایا AI بەکاربهێنین یان نا؟»؛ پرسیارە نوێیەکە ئەوەیە: کاتێک AI خۆی بڕیار دەدات بودجەکە لە کوێ و چۆن خەرج بکرێت، ڕۆڵی مرۆڤ لە بەڕێوەبردنی ڕیکلامدا چی دەبێت؟
