AI ئێدی بتنێ ئامرازەکێ مارکێتینگێ نینە؛ د ساڵا ٢٠٢٦ان دا نێزیکی ١٢٪ ژ خەرجییێن ڕیکلامێ ل ئەمریکایێ ب ڕێکا سیستەمێن ئۆتۆماتیکی و AI ـێ هێنە بەڕێڤەبرن
گوهۆڕینەکا مەزن د بازاڕێ ڕیکلامێ دا یا ڕوو ددەت. زیرەکییا دەستکرد ئێدی بتنێ بۆ نڤیسینا ناڤەڕۆکێ، دروستکرنا وێنەیان یان شیکرنا داتایان ناهێتە بکارئینان؛ بەڵکو هێدی هێدی بەشەکێ مەزنتر ژ بریارێن بەڕێڤەبرن و خەرجکرنا بودجەیا ڕیکلامێ دگریتە دەست.
IAB د نووترین پێشبینییا خۆ دا بۆ ساڵا ٢٠٢٦ان، پێشبینییا گەشەکرنا خەرجییێن ڕیکلامێ ل ئەمریکایێ ژ ٩.٥٪ بۆ ١٢.٣٪ بلند کرییە. د هەمان دەمدا، پێشبینییا Madison & Wall نیشان ددەت کو د ساڵا ٢٠٢٦ان دا نێزیکی ١٢٪ ژ خەرجییێن ڕیکلامێ ل ئەمریکایێ دێ ب ڕێکا کەمپینێن ئۆتۆماتیکی و سیستەمێن AI ـێ هێنە بەڕێڤەبرن. ئەڤ ڕێژە د ساڵا ٢٠٢٣ان دا بتنێ ٢٪ بوو؛ واتە د ماوێ سێ ساڵان دا نێزیکی شەش هێندە بوویە.
بەلێ ئەڤە چ واتایێ ددەت؟
د شێوازێ کەڤن یێ ڕیکلامێ دا، مارکێتەر بخۆ بەشەکێ مەزن ژ بریارێن کەمپینێ ددا: کێ ڕیکلام ببینیت؟ چەند پارە بۆ هەر گروپەکی بهێتە خەرجکرن؟ ڕیکلام ل کیڤە بهێتە نیشاندان؟ و بودجە چاوا بهێتە دابەشکرن؟
نوکە ئەڤ شێوازە یا دهێتە گوهۆڕین.
سیستەمێن وەک Google Performance Max، AI Max و Meta Advantage+ دشێن بەشەکێ مەزن ژ ڤان بریاران ب شێوەیەکێ ئۆتۆماتیکی بدەن. مارکێتەر ئارمانج، بودجە و داتایێن کەمپینێ دیار دکەت، پاشی سیستەم ب هاریکاریا AI ـێ هەوڵ ددەت بریار بدەت کو ڕیکلام بۆ کێ بهێتە نیشاندان، ل کیڤە بهێتە نیشاندان و بودجە چاوا بهێتە خەرجکرن، دا کو باشترین ئەنجام بهێتە دەستخستن.
ئەڤ ئاراستە بتنێ ل Google و Meta ناهێتە دیتن. TikTok، Reddit و Pinterest ژی جۆرێن جودا یێن کەمپینێن ئۆتۆماتیکی پێشکێش دکەن. بەپێی داتایێن Tinuiti، د ناڤ کڕیارێن Retail یێن ڤێ کۆمپانییێ دا، Performance Max ژ دووماهییا ساڵا ٢٠٢٥ان ڤە نێزیکی ٦٠٪ تا ٧٠٪ ژ خەرجییێن ڕیکلامێ پێک ئینایە.
پێشبینی نیشان ددەن کو ئەڤە بتنێ دەستپێکا گوهۆڕینێیە. Madison & Wall پێشبینی دکەت کو هەتا ساڵا ٢٠٣٠ی، خەرجییێن ڕیکلامێ یێن کو AI ئاراستە دکەت، بگەهنە نێزیکی ١٥٨ ملیار دۆلاران. ئەڤە ژی نێزیکی ٢٧٪ ژ هەمی بازاڕێ ڕیکلامێ یێ ئەمریکایێ پێک دئینیت.
ئەڤ گوهۆڕینە دشێت ڕۆلێ مارکێتەران ژی بگوهۆڕیت. د جهێ کو زۆربەیا دەمێ خۆ بۆ گوهۆڕینا Bid، هەلبژارتنا Audience و دابەشکرنا بودجەیێ ب دەستی خەرج بکەن، ڕۆلێ مارکێتەران دێ پتر بچیتە سەر دانانا ستراتیژییێ، دیارکرنا ئارمانجێن دروست، دابینکرنا داتایێن باش، دروستکرنا Creative ـێ بەهێز و چاڤدێریکرنا بریارێن AI ـێ.
بەلێ ئەڤە ب هیچ شێوەیەکی واتا ناکەت کو ئێدی پێدڤی ب مارکێتەران نینە. ب پێچەوانەی، دەمێ AI بەشەکێ مەزنتر ژ بریارێن کەمپینێ دگریتە دەست، پرسیارەکا گرنگتر پەیدا دبیت: کێ دێ چاڤدێرییا بریارێن AI ـێ کەت؟
AI دشێت بەپێی داتا و ئارمانجێن دیارکری بودجەیێ بەڕێڤە ببەت، بەلێ هێشتا مرۆڤە یێ کو دڤێت دیار بکەت ئارمانج چییە، کیژ داتا دروستن و کیژ ئەنجام ب ڕاستی بۆ کاروباری ب نرخن.
لەورا گوهۆڕینا مەزن ئەو نینە کو AI هاتییە د ناڤ مارکێتینگێ دا؛ ئەو قۆناغە دەرباز بوویە. گوهۆڕینا ڕاستەقینە ئەوەیە کو AI هێدی هێدی ژ ئامرازەکێ هاریکار دگوهۆڕیت بۆ سیستەمەکی کو بخۆ بەشەک ژ بریارێن خەرجکرنا بودجەیا ڕیکلامێ ددەت.
بۆ مارکێتەران ژی پرسیار ئێدی ئەو نینە کو «ئایا AI بکار بینین یان نە؟» پرسیارا نوی ئەڤەیە: دەمێ AI بخۆ بریار ددەت بودجە ل کیڤە و چاوا بهێتە خەرجکرن، ڕۆلێ مرۆڤی د بەڕێڤەبرنا ڕیکلامێ دا دێ چی بیت؟
