(کۆمێرسی خێرا - Quick Commerce) خەریکە دەبێتە یەکێک لە زەبەلاحترین کەناڵەکانی ڕیکلام؛ خەرجیی براندەکان ٥٠٪ زیاد دەکات
«پلاتفۆرمەکانی گەیاندنی خێرا چیتر تەنها شوێنێک نین بۆ کڕین؛ ئەوان بوونەتە گەورەترین کەناڵی ڕیکلام لەو خاڵەی کە کڕیار تەنها چەند خولەکێک لە بڕیاری کڕینەوە دوورە!»
پلاتفۆرمەکانی وەک (Blinkit)، (Zepto) و (Swiggy Instamart) خەریکن دەبنە یاریزانی سەرەکی لە بازاڕی ڕیکلامدا. بەپێی ڕاپۆرتێکی نوێی (Datum Intelligence)، پێشبینی دەکرێت لە وەرزی جەژنەکانی ساڵی ٢٠٢٦ لە هیندستان، براندەکان بڕی ٢,٢٠٠ کرۆر ڕوپیە تەنها بۆ ڕیکلامکردن لە پلاتفۆرمەکانی (Quick Commerce) خەرج بکەن، کە ئەمەش بەراورد بە ساڵی ڕابردوو بە ڕێژەی ٥٠٪ زیادیکردووە.
ئەم کەناڵە بەتەنیا نزیکەی ١٩٪ی کۆی بودجەی ڕیکلامی بازرگانی (Retail Media و Commerce)ی ئەم وەرزە پێکدەهێنێت. لە ئێستادا ئەم پلاتفۆرمانە زیاتر لە ٦٠ ملیۆن بەکارهێنەریان هەیە و لە نیوەی یەکەمی ٢٠٢٦دا، ٢٢٪ی کۆی قەبارەی کاڵای فرۆشراوی ئۆنلاین (GMV)یان پێکهێناوە.
بەڵام کێشەیەکیش هەیە: بەهۆی داواکارییەکی زۆر و کەمیی ڕووبەری ڕیکلام لەناو ئەپەکاندا، نرخی ڕیکلامکردن لەم پلاتفۆرمانەدا لە وەرزی جەژندا لە نێوان ٣٠٪ بۆ ٤٠٪ بەرزبووەتەوە. هەرچەندە شیکەرەوان پێشبینی دەکەن قازانجی گەڕاوە لە ڕیکلام (ROAS) بگاتە ٥ بۆ ٦ هێندە، بەڵام ئەمە تەنها مەزەندەیەکە و بۆ هەموو براندێک مسۆگەر نییە.
بۆچی ئەمە بۆ بازاڕی مارکێتینگ گرنگە؟ چونکە (Retail Media) خەریکە لە قۆرخکاریی ئەمازۆن (Amazon) و ماڵپەڕی سوپەرمارکێتەکان دەردەچێت و دەچێتە شوێنێک کە «دۆزینەوەی کاڵا - Discovery» و «کڕین - Purchase» تەنها چەند خولەکێک لە یەکترەوە دوورن. بەتایبەتی بۆ کەلوپەلە خێرا بەکاربەراوەکان (FMCG)، پلاتفۆرمەکانی (Quick Commerce) ڕیکلام لە قۆناغی "دروستکردنی ئاگاداری"یەوە دەگوازنەوە بۆ دروستکردنی کاریگەریی ڕاستەوخۆ لەسەر بڕیاری کڕین لە هەمان ساتدا.
خاڵە هەرە سەرنجڕاکێشەکە ئەوەیە کە تەنها ٢٠٪ی براندەکان بەرپرسن لە ٨٠٪ی کۆی فرۆشی ئەم پلاتفۆرمانە. واتە گەشە و گەورەبوونی ئەم کەناڵە بەو مانایە نییە کە هەموو براندێک بە یەکسانی سوودی لێ دەبینێت؛ براوەکان تەنها ئەوانەن کە ستراتیژییەکی دروستیان هەیە.
