(کۆمێرسێ ب لەز - Quick Commerce) خەریکە دبیتە ئێک ژ زەبەلاحترین کەناڵێن ڕیکلامێ؛ خەرجییا براندان ٥٠٪ زێدە دکەت
«پلاتفۆرمێن گەهاندنا ب لەز ئێدی نە بتنێ جهەکن بۆ کڕینێ؛ ئەو بووینە مەزنترین کەناڵێ ڕیکلامێ ل وێ خالا کو کڕیار بتنێ چەند خولەکەکێ ژ بڕیارا کڕینێ یێ دوورە!»
پلاتفۆرمێن وەکی (Blinkit)، (Zepto) و (Swiggy Instamart) خەریکە دبنە یاریزانێ سەرەکی د بازاڕێ ڕیکلامێ دا. ل گۆرەی ڕاپۆرتەکا نوی یا (Datum Intelligence)، پێشبینی دهێتە کرن د وەرزێ جەژنێن سالا ٢٠٢٦ێ ل هندستانێ، براند کۆژمێ ٢,٢٠٠ کرۆر ڕووپیەیان بتنێ بۆ ڕیکلامکرنێ ل پلاتفۆرمێن (Quick Commerce) خەرج بکەن، کو ئەڤە ژی هەڤبەر ب سالا بۆری ب ڕێژەیا ٥٠٪ زێدە بوویە.
ئەڤ کەناڵە ب تنێ نێزیکی ١٩٪ ژ کۆما بودجەیا ڕیکلاما بازرگانی (Retail Media و Commerce) یا ڤی وەرزی پێکدئینیت. د نۆکە دا ئەڤ پلاتفۆرمە زێدەتر ژ ٦٠ ملیۆن بکارئینەران هەنە و د نیڤا ئێکێ یا ٢٠٢٦ێ دا، ٢٢٪ ژ کۆما قەبارەیێ کەلوپەلێن فرۆتی یێن ئۆنلاین (GMV) پێکئینایە.
لێ ئاریشەیەک ژی هەیە: ژبەر داخوازییەکا زۆر و کێمییا ڕووبەرێ ڕیکلامێ د ناڤ ئەپلیکەیشنان دا، بهایێ ڕیکلامکرنێ ل ڤان پلاتفۆرمان د وەرزێ جەژنێ دا د ناڤبەرا ٣٠٪ بۆ ٤٠٪ بلند بوویە. هەرچەندە شڕۆڤەکار پێشبینی دکەن قازانجێ ڤەگەڕیایی ژ ڕیکلامێ (ROAS) بگەهیتە ٥ بۆ ٦ جاران، لێ ئەڤە بتنێ مەزەندەیەکە و بۆ هەمی براندان یا مسۆگەر نینە.
بۆچی ئەڤە بۆ بازاڕێ مارکێتینگێ یا گرنگە؟ چونکی (Retail Media) خەریکە ژ قۆرخکارییا ئەمازۆنێ (Amazon) و مالپەڕێن سوپەرمارکێتان دەردکەڤیت و دچیتە جهەکی کو «دیتنا کەلوپەلی - Discovery» و «کڕین - Purchase» بتنێ چەند خولەکەکێ ژ ئێك دوورن. ب تایبەتی بۆ کەلوپەلێن ب لەز بکارئینای (FMCG)، پلاتفۆرمێن (Quick Commerce) ڕیکلامێ ژ قۆناغا "دروستکرنا ئاگەهدارییێ" دگۆهێزن بۆ دروستکرنا کاریگەرییا ڕاستەوخۆ ل سەر بڕیارا کڕینێ د هەمان دەم دا.
خالا هەرە سەرنجڕاکێش ئەڤەیە کو بتنێ ٢٠٪ ژ براندان بەرپرسن ژ ٨٠٪ ژ کۆما فرۆتنا ڤان پلاتفۆرمان. ئانکو گەشە و مەزنبوونا ڤی کەناڵێ ب وێ مانایێ نینە کو هەمی براند ب یەکسانی مفای ژێ دبینن؛ سەرکەفتی بتنێ ئەون یێن کو ستراتیژییەکا دروست هەی.
