تەنها ناوەڕۆک بەس نییە؛ بۆچی Salesforce بڕی ٥.٦٦ ملیار دۆلار بۆ «ناسینی کڕیار» خەرج دەکات؟
«لە جیهانی مارکێتینگدا هەمووان باس لەوە دەکەن کە زیرەکیی دەستکرد چۆن دەق و وێنە دروست دەکات، بەڵام مامەڵە ٥.٦٦ ملیار دۆلارییەکەی Salesforce ئاماژەیە بۆ شتێکی گەورەتر: داهاتووی مارکێتینگ لە دروستکردنی ناوەڕۆکدا نییە، بەڵکو لە ناسینی کڕیار و بڕیاردانی ڕاستەقینەدایە!»
کۆمپانیای (Salesforce) ڕاگەیاند کە ڕێککەوتنێکی کۆتایی واژۆ کردووە بۆ کڕینی پلاتفۆرمی بەناوبانگی (Braze)، کە تایبەتە بە کارلێک و پەیوەندیی کڕیار (Customer Engagement)، بە بەهای نزیکەی ٥.٦٦ ملیار دۆلار.
پلاتفۆرمی Braze چی دەکات؟ بە شێوەیەکی سادە، یارمەتیی براندەکان دەدات ڕەفتاری کڕیاران لە کاتی ڕاستەقینەدا (Real-time) بخوێننەوە و پەیوەندیی گونجاویان لەگەڵ دروست بکەن. بۆ نموونە: کڕیارێک دەچێتە ناو ئەپێکی فرۆشتنەوە، کاڵایەک دەخاتە سەبەتەکەیەوە بەڵام نایکڕێت و دەچێتە دەرەوە. سیستەمەکە ڕاستەوخۆ ئەم ڕەفتارە تۆمار دەکات و دەست بە بڕیاردان دەکات:
چ پەیامێک بۆ ئەم کڕیارە گونجاوە؟
کەی بنێردرێت؟
لە چ کەناڵێکەوە بنێردرێت (ئیمەیڵ، ئەپ، کورتەنامە، یان واتسئەپ)؟
چ جۆرە پێشنیارێک یان داشکاندنێک ئەگەری گەڕاندنەوەی کڕیارەکە زیاتر دەکات؟
بەڵام بەشی هەرە سەرنجڕاکێش لێرەدا (BrazeAI)ـیە. زیرەکییە دەستکردەکە تەنها پەیامەکان نانووسێت، بەڵکو لە هەڵبژاردنی ناوەڕۆک، پێشنیار، کەناڵ و کاتی ناردنی پەیامەکەدا یارمەتیی مارکێتەر دەدات. واتە لەبری ئەوەی یەک پەیامی گشتی بۆ هەزاران کڕیار بنێردرێت، ئاراستەکە بەرەو سیستەمێک دەگۆڕێت کە دەزانێت: (کام کڕیار + کام پەیام + کام کەناڵ + کام کات).
گواستنەوە لە «ئۆتۆمەیشن»ـەوە بۆ «بڕیاردان» ئەمەش ڕێک ئەو خاڵەیە کە مامەڵەکەی Salesforce گرنگ و ستراتیژی دەکات. (Salesforce) خاوەنی گەورەترین سیستەمی (CRM) و داتای پەیوەندیی کڕیارە، (Braze) توانای وەڵامدانەوەی ڕەفتاری کڕیاری لە کاتی ڕاستەقینەدا هەیە، وە زیرەکیی دەستکردیش دەتوانێت لە نێوان ئەو داتایانەدا بڕیار بدات. ئەگەر ئەمانە بە سەرکەوتوویی پێکەوە ببەسترێنەوە، مارکێتینگ هەنگاوێکی گەورە لە قۆناغی (Automation)ـەوە بەرەو قۆناغی بڕیاردان (Decisioning) دەنێت.
بۆ مارکێتەرەکان، ئەمە گۆڕانکارییەکی زەبەلاحە. لە داهاتوودا پێشبڕکێی نێوان براندەکان تەنها لەسەر ئەوە نابێت کێ باشترین ڕیکلام دروست دەکات، بەڵکو لەسەر ئەوەیە کێ باشتر لە کڕیارەکەی تێدەگات و لە کاتی گونجاودا وەڵامی دەداتەوە.
بۆیە، Salesforce بەم ٥.٦٦ ملیار دۆلارە تەنها پلاتفۆرمێکی مارکێتینگ ناکڕێت؛ بەڵکو گرەو لەسەر داهاتووی مارکێتینگ دەکات: داهاتوویەک کە تێیدا AI تەنها ناوەڕۆک (Creative) دروست ناکات، بەڵکو بەشدارییەکی کارا لە بڕیارە ستراتیژییەکانی مارکێتینگیشدا دەکات.
(تێبینی: ڕێککەوتنی کۆتایی واژۆ کراوە، بەڵام مامەڵەکە هێشتا تەواو نەبووە و پێویستی بە پەسەندی پشکداران و دەسەڵاتە ڕێکخەرەکان هەیە، و چاوەڕێ دەکرێت لە ساڵی دارایی ٢٠٢٨دا بە تەواوی جێبەجێ بکرێت).
