Ji reklamê bo demborandinê; Çawa zincîreya kurt a L'Oréalê selimand ku çîrokbêjî çekê herî bibandor ê kirrûbirrê ye?

Kompanyaya L’Oréal bi rêya branda ciwankariyê Urban Decay ve, şêwazekî cuda yê reklamkirinê ezmûn kiriye. Li şûna ku reklameke asayî ji bo berhemên ciwankariyê drust bike, li gel platforma ReelShort zincîre fîlmeke kurt û şeş xelekî bi navê Xêza Germ a Nêçîrvanên Tarmayiyan (Ghost Hunter Hotline) berhem aniye. Ev zincîre çîrokeke xeyalî û balkêş vedigêre û berhemên brandê di nav rûdawên çîrokê de nîşan dide. Li gorî hejmarên bi xwe brandê, zincîre di pênc rojên yekem de 3.8 mîlyon caran hatiye dîtin. Lê çima ev pêngav girîng e? Çimkî Urban Decay li şûna ku tenê peyameke reklamî bigihîne bîner, hewl daye naverokekê drust bike ku xelk bi heza xwe lê temaşe bikin. Mînak, di reklameke asayî de renga kesek bibêje: «Vî berhemî bikire, çimkî baş e.» Lê di vî şêwazî de, destpêkê çîrokeke balkêş tê pêşkêşkirin û berhem dibe beşek ji wê çîrokê. Ev jî peywendî bi guhertineke girîng di kirrûbirrê de heye, ku tê de brand ji drustkirina reklamê ber bi berhemanîna naveroka demborandinê ve diçin. Wate brand ne tenê hewl dide berhemî bifroşe, belkî hewl dide bîner bi çîrokê ve girêbide. Lê ew 3.8 mîlyon dîtin, ku ji aliyê bi xwe brandê ve hatiye ragihandin, bi tenê nîşan nade ka çend kesan berhem kiriye. An bi yek hukmê kurt: «Di cîhanekê de ku xelk dikarin bi hêsanî ji reklamê derbas bibin, çîroka baş dikare bibe sedema wê yekê ku bi heza xwe bimînin û lê temaşe bikin.»