Sam's Club bi alîkariya hişê çêkirî pêşbîniya kirînên pêşerojê yên xerîdaran dike, û ceribandineke P&G jî bandorkeriya bazargerîyê bi rêjeya 2,3 qatî zêde dike
Kompaniya Sam's Club sîstemeke nû ya armanckirinê bi piştbestina bi zîrekiya çêkirî û fêrbûna amîrê (Machine Learning) pêş xistiye ku bi navê Predictive Precision Targeting tê naskirin. Ev sîstem datayên endamên platformê û zêdetirî 400 nîşaneyên armanca kirrînê bi kar tîne daku pêşbînî bike kîjan kiriyar di pêşerojê de amade ye berhemek an jî markeyeke diyarkirî bikirre, heta berî ku kiriyar bi xwe biryara kirrînê dabe.
Cûdahiya bineretî ya vê modelê li gel sîstemên asayî yên reklamê ew e ku piranîya platforman pirsê ji rabirdûyê dikin, wekî ku kiriyar berê çi kirriye, li kîjan berhemê nêrî ye, an jî li gel kîjan markeyê danûstandin kiriye. Lê modela Sam's Club arasteyê diguhere û dipirse ka kiriyar di pêngava bê de dê çi bikirre. Sîstem bi şîrovekirina datayan, wan kesan diyar dike ku egera wan a herî zêde heye bibin kiriyarê nû yê markeyekê, û ne tenê giringiyê bi yek kirrînê dide, belkî nirxê demdirêj ê kiriyar jî pêşbînî dike.
Ji bo selmandina hêza vê sîstemê di pratîkê de, kompaniya P&G taqîkirinek encam da bi armanca firotina berhema Cascade Platinum Plus bi wan kesên ku berê ew nekirrîne. Modela pêşbînîker nêzîkî 800 hezar malbat destnîşan kirin ku reftara wan a kirrînê nîşan dida ku egera kirrîna vê berhemê ji aliyê wan ve heye. Bikaranîna vê sîstemê, bandora kampanyaya marketîngê bi rêjeya 2.3 qat zêde kir. Xala herî bihêz a sîstemê pêşbîniya wê ya demdirêj bû ku tê de modelê pêşbînî kiribû xerciya vê grûpa armanckirî di kirrîna pêşerojê de ji sedî 71 zêde dibe. Piştî derbasbûna 12 mehan û berawirdkirina pêşbîniyan bi datayên rasteqîn re, derket holê ku zîrekiya çêkirî bi rêjeya ji sedî 94 hûr û dirust bûye.
Teknolojî ne tenê ji bo balkişandina kiriyarên nû ye, belkî sîstem dikare wan kiriyaran jî destnîşan bike ku egera wê heye dev ji bikaranîna markeyekê berdin, û bi vê yekê derfetê dide markeyê ku berî ji destdana wan peywendiyê bi wan re bike û çareseriyekê ji wan re bibîne. Ji aliyekî din ve, ji bo berhemên mezin ên wekî televîzyonê jî model tê bikaranîn. Bo nimûne, kirrîna amûreke dengî (soundbar), konsola lîstikê an amûra weşanê ji aliyê kiriyarekî ve, ji bo sîstemê dibe nîşaneyek ku dibe ew malbat di 60 heta 90 rojên pêşerojê de niyeta kirrîn an guhertina televîzyona xwe hebe.
Ev nûçe peyameke mezin ji bo cîhana marketîngê heye, ji ber ku armanckirina kiriyar ji bersivdana reftara rabirdûyê derbasî pêşbînîkirina reftara pêşerojê dibe. Marke êdî li benda wê yekê namînin ku kiriyar li berhemekê bigere an niyeta xwe eşkere bike, belkî zîrekiya çêkirî hewl dide niyetê zûtir bixwîne û reklamê di dema guncaw de nîşan bide. Tevî vî pêşveçûnê, ev arasteya nû astengiyên cidî derbarê data û taybetmendiya kesî de çêdike. Pirsa mezin ew e ku kiriyar dê heta çi radeyekê asûde bin bi wê yekê ku sîstemeke zîrekiya çêkirî berî wan bizanibe pêdiviyên wan ên pêşerojê çi ne. Heger ev model berfireh bibe, pirsa serekî ya markeyan ji kiriyar berê çi kiriye dê biguhere bo kiriyar dê piştre çi bike.
