چەوا ماکدۆناڵدز دەمێ چاڤەڕێبوونا مشتەریێن خۆ دگۆڕیت بۆ دەلیڤەیەکا ملیار دۆلاری؟ ستراتیژییەکا نوو کو تێدا بتنێ بەرگەری نافرۆشیت، بەلکو بازرگانییێ ب سەرنج و مێشکێ بکارئینەری دکەت!
ماکدۆناڵدز، ئێک ژ مەزنترین زنجیرەیێن خوارنگەهێن جیهانێ، پێنگاڤەکا وێرەکانە و نوو د جیهانا بازارکرنێ دا هاڤێتییە، ئەو ژی گۆڕینا شاشەیێن دیجیتاڵی یێن مێنیویێ و ئامیرەیێن داخوازکرنا خوارنێ یە بۆ ژێدەرەکێ نوو یێ داهاتی، ب ڕێکا بەلاڤکرنا ڕیکلامان بۆ براندێن دی. ئەڤ هزرە ب شێوەیەکێ زیرەکانە یارییێ ب لایەنێ دەروونی و ڕەفتارا مشتەری دکەت؛ چونکی دەمێ مشتەری داخوازییا خۆ تۆمار دکەت و چاڤەڕێی ژەما خۆ یە، مێشکێ وی د ڕەوشا ئامادەباشییێ دا یە و ب تەمامی سەرنجا وی ل سەر شاشەیانە. ل ڤێرە، ماکدۆناڵدز وی چەند چرکە یان خۆلەکێن چاڤەڕێبوونێ ب کار دئینیت و دکەتە دەلیڤەیەکا زێڕین یا ڕیکلامێ. بۆ نموونە، مشتەرییەک دەمێ ل هیڤییا بەرگەرێ خۆ، دبیت ڕیکلاما کۆمپانییەکا بیمەیێ (تەئمیناتێ) یان بەرهەمەکێ ئەلیکترۆنی ل سەر شاشەیێ ببینیت.
ئەڤ ستراتیژییا نوو کو د جیهانا بازرگانییێ دا ب (Retail Media) دهێتە نیاسین، ئانکو گۆڕینا خوارنگەهەکێ بۆ کەناڵەکێ میدیایی. ماکدۆناڵدز ب خزمەتکرنا ڕۆژانە یا نێزیکی ٢٦ ملیۆن مشتەریان بتنێ ل ئەمریکا، خودانا ژینگەهەکا فیزیکی یا گەلەک قەرەباڵغ و پڕ بینەرە. وەکو چەوا زەبەلاحێن مینا ئەمازۆن و واڵمارت جهێ ڕیکلامێ ل سەر مالپەڕێن خۆ دفرۆشن، ماکدۆناڵدز هەمان کاری د جیهانا ڕاستەقینە و فیزیکی دا دکەت. جوداهی د وێ یەکێ دا یە کو ل ڤێرە مشتەری پێدڤی ناکەت مۆبایلا خۆ دەربێخیت یان مالپەڕەکێ ڤەکەت دا کو ڕیکلامەکێ ببینیت؛ بەلکو ڕیکلام ب خۆ دچیتە وێ ژینگەها کو مشتەری ژ بەرێ ڤە ب مەرەما کڕینێ قەستا وێرێ کری.
ئەڤ تاقیکرنە کو د قۆناغا خۆ یا ئێکێ دا ل ٤٥٠ تایێن ئەمریکایێ دەست پێ کری، ئارمانجەکا مەزن ل پشتە. کۆمپانیا ناڤبری پێشبینی دکەت کو ئەگەر ئەڤ مۆدێلە سەرکەفتی بیت، ئەڤ تۆڕا ڕیکلامی دکاریت ببیتە ژێدەرێ پەیداکرنا ئێک ملیار دۆلار داهاتێ سالانە یێ زێدە، ئەو ژی بێی کو پێدڤی ب ڤەکرنا چ تایێن نوو یان وەبەرهێنانەکا مەزن یا نوو بکەت بۆ ب دەستڤەئینانا وی پارەی.
لێ دگەل وێ چەندێ ژی، مەزنترین ئاستەنگ کو ڕووی ب ڕووی ڤێ پێنگاڤێ دبیت، پاراستنا ئەزموونا بکارئینەرییە. ئەرێ مشتەری دێ ژ دیتنا ڕیکلامێن دەرڤە د دەمێ کڕینا خوارنێ دا عاجز بیت؟ لەوما پێدڤییە ماکدۆناڵدز گەلەک ب هوشیاریڤە هەڤسەنگییەکێ بپارێزیت؛ ب شێوەیەکێ کو ڕیکلام د پەیوەندیدار و سەرنجڕاکێش بن، بێی کو سەرنجا سەرەکی یا مشتەری ل سەر ئەزموونا خوارنگەهێ و تاما خوارنێ تێک بدەن. ئەڤ پێنگاڤە پەیامەکا ڕوون ددەتە مە: د مۆدێلا نوو یا بازرگانییێ دا، هەبوونا قەرەباڵغیێ و مشتەریێن بەردەوام نە بتنێ بۆ فرۆتنا بەرهەمەکییە، بەلکو پێک دهێت ژ دروستکرنا پلاتفۆرمەکێ کو تو بشێی سەرنجا مرۆڤان تێدا بفرۆشی.
ئەرێ تە قەت هزر د وێ یەکێ دا کرییە کو ئەڤ جۆرێ «ڕەڤاندنا سەرنجێ» دێ کارتێکرنەکا چەوا هەبیت ئەگەر ل ژینگەهێن دی یێن وەکو مۆڵ و بازارێن کوردستانێ ژی بهێتە بجهئینان؟
