OpenAI شێوازەکێ نوی یێ ڕیکلامان تاقی دکەت: کلیککرن ل سەر ڕیکلامان دێ بیتە دەستپێکا گفتوگۆیەکا ڕاستەوخۆ و دوولایەنە ل گەل ژیرییا دەستکرد یا براندان د ناڤ ChatGPT دا
کۆمپانییا OpenAI پێنگاڤەکا نوی د بازاڕێ ڕیکلامان دا هاڤێتییە و فۆرماتەکێ نوی ب ناڤێ (Sponsored Agents) خستییە د بن تاقیکرنێ دا، کو ئارمانج ژێ گوهۆڕینا بنەڕەتی یا شێوازێ پەیوەندییا د ناڤبەرا ڕیکلامکار و کڕیاران دایە.
د ڕیکلامێن دیجیتاڵی یێن بەرچاڤ دا، دەمێ بکارئینەر کلیکێ (Click) ل سەر ڕیکلامەکێ دکەت، ئێکسەر دهێتە ڤەگوهاستن بۆ مالپەڕ یان ئەپێ براندی. لێ ب ڕێکا (Sponsored Agents) ڤە، بکارئینەر دشێت پشتی دیتنا ڕیکلامێ، ئێکسەر د ناڤ (ChatGPT) دا دەست ب گفتوگۆیەکا تایبەت ل گەل بریکارەکێ ژیرییا دەستکرد یێ سپۆنسەرکری یێ وی براندی بکەت.
بۆ نموونە، ئەگەر بکارئینەرەک ڕیکلاما مێزەکا نانخوارنێ ببینیت، ل شوینا کو ئێکسەر بچیتە مالپەڕێ فرۆشکەری، دشێت ژ ژیرییا دەستکرد یا براندی بپرسیت: "قەبارەیێ مێزێ چەندە؟"، "بۆ چەند کەسان یا گونجایە؟" یان "چەوا دێ پاراستن لێ هێتە کرن؟". پشتی وەرگرتنا بەرسڤان و ئامادەبوونێ بۆ پێنگاڤا دی، دشێت ب ڕێکا لینکەکێ (Link) بچیتە مالپەڕێ سەرەکی یێ فرۆشکەری بۆ کڕینێ.
کۆمپانییا OpenAI تەعکیدێ ل سەر وێ یەکێ دکەت کو ئەڤ جۆرە گفتوگۆیە ب ئاشکرایی وەکی ڕیکلاما سپۆنسەرکری (Sponsored) دهێنە نیشاندان و ب تەمامی ژ بەرسڤێن سەربەخۆ یێن ChatGPT و گفتوگۆیا سەرەکی یا بکارئینەری دهێنە جوداکرن.
د هەمان دەم دا، کۆمپانی بکارئینانا ژیرییا دەستکرد بۆ شارەزایێن مارکێتینگێ ب خۆ ژی بەرفرەهتر دکەت؛ ب ئاوایەکی کو ڕیکلامکار دشێت ب زمانەکێ ئاسایی داخوازێ ژ ChatGPT بکەت کەمپینەکا ڕیکلامێ دروست بکەت، دەستکاری بکەت، یان ئەنجامێن وان شڕۆڤە بکەت. هەروەسا، بڕێڤەبەرێ ڕیکلامان (Ads Manager) ب ئامرازێن نوی بۆ دەستکاریکرنا دەقێ ڕیکلامێ و وەرگێڕانا ئۆتۆماتیکی دێ هێتە ب هێزکرن.
هەروەسا، OpenAI ڕیکلامێن ChatGPT ب پلاتفۆرمێن وەکی (HubSpot) و (Shopify) ڤە گرێ ددەت. ئارمانج ژ ڤێ یەکێ ئەوە کو خودانێن کاری بشێن ڕیکلامێن خۆ بێخنە ناڤ وان ئامرازێن کو بەری نۆکە بۆ مارکێتینگێ، بڕێڤەبرنا پەیوەندییێن کڕیاران (CRM) و بازرگانییا ئەلیکترۆنی بکارئیناینە. پێدڤییە بهێتە گۆتن کو ئەڤ تایبەتمەندییا نوی (Sponsored Agents) هێشتا د قۆناغا تاقیکرنێ دایە و بتنێ بۆ هەژمارەکا دیارکری یا ڕیکلامکارێن ئەمریکا هاتییە بەردەستکرن.
ئەڤ نویاتییە ڕیکلامێ ژ پەیامەکا یەکلایەنە دگوهۆڕیت بۆ گفتوگۆیەکا دوولایەنە. هەتا نۆکە ئارمانجا سەرەکی یا گەلەک ژ ڕیکلامێن دیجیتاڵی بتنێ ڕاکێشانا سەرنجێ و ب دەستڤەئینانا کلیکەکێ بوویە، لێ د ڤی مۆدێلێ نوی دا، کلیککرن نە دووماهییا پرۆسەیا ڕیکلامێ یە، بەلکو دێ بیتە خالا دەستپێکا گفتوگۆیەکێ د ناڤبەرا کڕیار و ژیرییا دەستکرد یا کاری دا.
ئەگەر ئەڤ فۆرماتە سەرکەفتی بیت و پتر بهێتە بەرفرەهکرن، وی دەمی دێ تەمامییا گەشتا کڕیاری—ژ دیتنا ڕیکلامێ ڤە بەرەڤ پسیارکرنێ، بەراوردکرنا بژاردەیان، هەتا نێزیکبوون ژ بڕیارا کڕینێ—د ناڤ ئێک ئەزموونا گفتوگۆیی دا کۆم کەت.
