گوهۆڕینەکا مەزن د ڕیکلاما تەلەڤزیۆنی دا؛ واڵمارت (Walmart) ب داتایێ کڕیارێن خۆ پێڤەرا سەرکەفتنا ڕیکلامان دکەت
«ل گووگلێ ئەم دزانین خەلک ل دویڤ چ دگەڕیێت، ل مێتا ئەم دزانین چ ب دلێ وانە، لێ واڵمارت دزانیت خەلک ب ڕاستی چ دکڕیت! نۆکە ئەڤ چەکێ مەزن دچیتە ناڤ ڕیکلامێن تەلەڤزیۆنێ ڤە و هەمی تشتەک دگوهۆڕیت.»
واڵمارت (Walmart) گاڤەکا زەبەلاح بەرەڤ کۆنترۆلکرنا بازاڕێ ڕیکلامێ دهاڤێژیت. بەشێ ڕیکلامێ یێ کۆمپانیایێ (Walmart Connect) ب هەڤپشکی ل گەل (Warner Bros. Discovery) ڕاگەهاندیە، بۆ ئێکەمین جار ڕیکلامکەر دشێن داتایێ کڕیارێن واڵمارتێ بکاربینن بۆ ئارمانجکرنێ (Targeting) د تەلەڤزیۆنا ڕاستەوخۆ دا (Live Linear TV).
خەیال بکە تۆ براندەکێ خوارنێ یان کەرەستەیێن ناڤمالی یی. بەرێ تە ڕیکلاما خۆ د تەلەڤزیۆنێ دا پەخش دکر و تە بتنێ ددیت کا چەند کەسان پێگەهشتییە (Reach). لێ پسیارا زەحمەت بێ بەرسڤ دما: ئەرێ وان کەسێن ڕیکلام دیتین، پاشان بەرهەمێ وان کڕی؟ نۆکە ب ڕێیا (Walmart DSP)ـێ ڤە، براند دشێن ڕیکلامێن خۆ د کەناڵێن وەک TBS، TLC، truTV و Food Network دا نیشان بدەن و ب تەمامی بگرێدن ب داتایێ کڕینێ ڤە.
هێزا واڵمارتێ د وێ یەکێ دا یە کو حەفتیانە نێزیکی ١٥٠ ملیۆن کڕیاران سەرەدانا فرۆشگەهێن فیزیکی و مالپەڕێ وێ دکەن. ئەڤە ئانکو واڵمارت سیگناڵەک هەیە کو تەنانەت زەبەلاحێن تەکنەلۆژیایێ ژی ب ساناھی دەستێ وان ناگەهیتێ: داتایێ کڕینا ڕاستەقینە (Actual Purchase Data). سیستم دشێت پێڤانێ بکەت کو ئەرێ وی کەسێ ڕیکلام ل تەلەڤزیۆنێ دیتی، پاشان چوو ل واڵمارتێ بەرهەم کڕی یان نە. ئەڤە ژی وەدکەت تەلەڤزیۆن ژ ئامرازەکێ بۆ دروستکرنا هۆشیاریێ (Awareness)، بکەڤیتە بن فشارا پسیارا فرۆشتنێ (Performance).
ستراتیژییا واڵمارتێ بتنێ د تەلەڤزیۆنێ دا کورت نابیت. کۆمپانیایێ هەڤپشکییێن خۆ بۆ Spotify و Yahoo DSP بەرفرەهـ کرینە، هەروەسا پێشتر ژی ل گەل VIZIO CTV تاقیکرنەکا سەرکەفتی هەبوویە. ب ڤان گاڤان، واڵمارت سنوورێ (Retail Media) دشکێنت؛ کو پێشتر بتنێ پارەدان بوو بۆ دەرکەفتنا بەرهەمەکی ل سەر مالپەڕێ واڵمارت. نۆکە دەرباز دبیت بۆ (Commerce Media)، ئانکو بکارئینانا داتایێ کڕینێ بۆ ئارمانجکرنا بکارئینەران د دەنگ (Audio)، ڤیدیۆ، و تەلەڤزیۆنا گرێدایی دا (CTV).
بازاڕێ ڕیکلامێ پێ ددەتە قۆناغەکێ کو گەهشتن (Reach) ب تنێ تێرا ناکەت. براند دڤێن بزانن ئەرێ خەرجییێ ڕیکلامێن وان بوویە سەدەما فرۆشتنا ڕاستەقینە؟ گووگل زانیارییێن ئارمانجا لێگەڕیانێ (Search Intent) هەنە، مێتا زانیارییێن هەلسوکەفتێ جڤاکی (Social Behavior) هەنە، لێ واڵمارت داتایەکێ ببهاتر هەیە: ئەو تشتێ کڕیار ب ڕاستی پارەی بۆ ددەت. هەڤڕکییا پاشەڕۆژێ یا ڕیکلامێ ل سەر وێ یەکێ نینە کا کێ زۆرترین بینەر هەنە، بەلکو ل سەر وێ یەکێ یە کا کی باشتر دزانیت بینەرێن وی چ دکڕن.
