Google ڕیکلامان دئینیتە ناڤ Gemini؛ هەڤڕککێیا مارکێتینگێ ژ لێگەڕیانێ (Search) ڤەدگوهێزیتە بۆ گۆتوبێژێ ل گەل AI
«پشتی ب سالان هەڤڕکی بۆ گرتنا ڕێزا ئێکێ د ئەنجامێن گووگلێ دا، نۆکە هەڤڕکییەکا نوی دەست پێدکەت: دێ چاوا براندێ خۆ ئێخییە ناڤ گۆتوبێژا Gemini؟»
ل گۆرەی ڕاپۆرتەکا نوی یا Adweek، کۆمپانییا Google د گۆتوبێژێ دا یە ل گەل هژمارەکا کڕیارێن خۆ یێن ڕیکلامێ و بۆ وان ڕاگەهاندیە کو پلان هەیە د سالا ٢٠٢٦ێ دا ڕیکلامان بینیتە ناڤ چاتبۆتێ Gemini. دوو شارەزایێن کڕینا میدیایێ (Media Buyer) کو ئاگەهدارێ گۆتوبێژان بوون، ئەڤ هەوالە پشتڕاست کری یە. لێ هەتا نۆکە Googleـێ چ هوورگاتییەک ل دۆر شێوازێ دەرکەفتنا ڕیکلامان، بهایان، یان قۆناغا تاقیکرنێ ئاشکرا نەکرینە.
خالا هەرە سەرنجڕاکێش یا ڤێ پێشهاتێ ئەوە کو ئەڤ پلانە ب تەمامی جودا یە ژ مۆدێلێ (Google AI Overviews) کو مە پێشتر دیتبوو. ل ڤێرێ ڕیکلام ناکەڤنە ناڤ ئەنجامێن لێگەڕیانەکا ئاسایی ب هاریکارییا AI، بەلکو پلاتفۆرمێ چاتبۆتێ Gemini ب خۆ دبیتە ژینگەهەکا نوی بۆ نیشاندانا ڕیکلامان.
ئەڤ گاڤە بنەمایێ ڕیکلاما دیجیتاڵی دگوهۆڕیت. د مۆدێلێ کەڤن یێ لێگەڕیانێ (Search) دا، براندان ل سەر پەیڤێن سەرەکی (Keywords) و دەرکەفتن د ڕێزبەندییا ئێکێ دا هەڤڕکی دکر. لێ د ناڤ چاتبۆتەکێ ژیرییا دەستکرد دا، ئەزموون ب تەمامی جودا یە. بکارئینەر ئێدی ب پەیڤێن پچڕپچڕ ناگەڕیێت، بەلکو پسیارەکا ڕاستەوخۆ دکەت: "باشترین لاپتۆپ بۆ کارێ دیزاینێ چییە؟" و AI ب شێوەیێ گۆتوبێژێ بەرسڤێ ددەت.
ئەگەر ڕیکلام بچیتە ناڤ ڤێ ژینگەهێ، پسیارا مەزن ل هەمبەر مارکێتەران دگوهۆڕیت. ئێدی ئاریشە ئەوە نینە دێ چاوا د لیستا ئەنجامێن لێگەڕیانێ دا دەرکەڤی، بەلکو ئاستەنگا نوی ئەڤە یە: دێ چاوا براندێ خۆ کییە بەشەک ژ بەرسڤان و گۆتوبێژا ژیرییا دەستکرد ب ئاوایەکێ سروشتی و باوەڕپێکری؟
