دهێتە پێشبینیکرن کو بازاڕێ ڕیکلاما فرۆشگەهێن مەزن (Retail Media) د سالا ٢٠٢٦ێ دا ب ڕێژەیا ٢٣٪ گەشە بکەت، لێ سەرباری ڤێ گەشبینییێ، ڤالاهییەکا مەزن د ناڤبەرا ئارمانج و شیانێن جێبەجێکرنا وان دا هەیە.
مۆدێلێ Retail Media ئەوە کو فرۆشگەهێن زەبەلاح یێن وەکی ئەمازۆن و واڵمارت جهێ ڕیکلامێ د مالپەڕ و ئەپێن خۆ دا دفرۆشنە براندێن جودا. بۆ نموونە، دەمێ کو کڕیار ل جۆرەکێ قەهوەیێ دگەڕیت، براندەک دشێت پارەی بدەت دا کو بەرهەمێ وێ ل ڕێزا پێشییێ دەربکەڤیت. ب ڤێ یەکێ، فرۆشگەهـ ژبلی قازانجا فرۆتنا بەرهەمی، داهاتەکێ دی ژی ژ فرۆتنا جهێ ڕیکلامێ ب دەست خۆ ڤە دئینیت.
ل گۆرەی داتایێن سارا مارزانو، شڕۆڤەکارا eMarketer ل کۆنفرانسێ Groceryshop 2026، ڕێڤەبەرێن ڤان تۆڕان چاڤەڕێی گەشەبوونەکا ٢٣٪ دکەن. لێ کێمتر ژ ئێک ل سەر پێنجێ وان پێشبینی دکەن کو ژ پلانێن خۆ دەرباز ببن، و نێزیکی سێیەکا وان هزر دکەن کو ناگەهنە ئارمانجێن خۆ یێن دیارکری. دودلییا فرۆشگەهان پتر پەیوەندی ب پێڤانا کارتێکرنا ڕاستەقینە یا ڕیکلامان ڤە هەیە. بتنێ ٣١٪ ژ ڕێڤەبەڕان پشتڕاستن کو داهاتێن وان پارەیێ نوی یە و نە بتنێ بودجەیا ڤەگوهاستی یا براندانە ژ کەناڵێن دیتر. ئەڤە ژی دوو چەمکێن ستراتیژییا مارکێتینگێ دئێخیتە پێش: ڤەگەڕیانا وەبەرهێنانێ (ROI) کو قەبارەیا وی داهاتی دپێڤیت یێ کو ل هەمبەری خەرجییا ڕیکلامێ ب دەست هاتییە، ل گەل زێدەبوونا ڕاستەقینە (Incrementality) کو بەرسڤا وێ پرسیارا هویر ددەت کا ئەرێ بێی ڤێ ڕیکلامێ ژی دێ کڕیار هەر وێ کڕینێ ئەنجام دەت یان نە.
د دەمێ نۆکە دا براند بتنێ ب دیتنا هەژمارا کلیکان ڕازی نابن، بەلکو دڤێن بزانن کو ڕیکلامێ ب دیارکری چەند کڕینێن زێدە دروست کرینە. بۆ ب دەستڤەئینانا گەشەیا نێزیک ژی، فرۆشگەهـ هێشتا پتر پشت ب فۆرماتێن بەربەلاڤ یێن وەکی گەڕیانا سپۆنسەرکری و ژیرییا دەستکرد گرێ ددەن. چارەسەرکرنا ڤان ئاستەنگییان نە بتنێ ب تەکنەلۆژیایێ دهێتە کرن؛ بەلکو پێدڤی ب ئێکگرتنا تەمام یا تیمێن مارکێتینگ، فرۆتن، داتا و ڕێڤەبەرییا فرۆشگەهێ هەیە. دەمێ کو ڕیکلامەک سەرنجا کڕیارەکی ڕادکێشیت، پێدڤییە ئەو بەرهەم ب کرداری د فرۆشگەهێ دا یێ بەردەست بیت دا کو کڕین بجهـ بهێت.
وەکی کو نوێنەرێ کۆمپانییا P&G د کۆنفرانسێ دا ئاماژە پێ کری، نابیت هەڤپەیمانییا ناڤبەرا براند و فرۆشگەهێ بتنێ د کەمپینەکا کورتخایەن دا بهێتە کورت کرن. پێدڤییە ستراتیژی دەمدرێژ بیت و ئارمانج ژێ ناساندنا براندی و دروستکرنا حەزا کڕینێ بیت. د ڤێ قۆناغا نوی دا، Retail Media ژ ژێدەرەکێ زێدە یێ داهاتی دبیتە کۆلەکەکا سەرەکی یا مارکێتینگا براندان. پرسیارا ئێکلاکەرەوە یا پاشەڕۆژێ دێ نە ئەو بیت کا چەند پارە هاتییە خەرج کرن، بەلکو دێ ئەو بیت کا ئەڤ پارەیە دشێت چەند کڕینێن ب تەمامی نوی دروست بکەت.
