سەلیقە لەبری پرۆمپت؛ بۆچی لە سەردەمی AIـدا «هەڵسەنگاندنی مرۆڤ» گرانبەهاترین توانایە؟
«ئەگەر زیرەکیی دەستکرد بتوانێت لە چەند خولەکێکدا ڕیکلامێک دروست بکات، مانای ئەوە نییە کە کڕیار حەتمەن پەسەندی دەکات و قبووڵیەتی!»
توێژینەوەیەکی تازەی (DoubleVerify) نیشانی دەدات کە ٤٧٪ی کڕیاران لە سەنگافورە دەڵێن، ئەگەر براندێک زیرەکیی دەستکرد (AI) بۆ دروستکردنی ڕیکلامێکی کەم‌کوالێتی، نامۆ یان ناسروشتی بەکاربهێنێت، دید و تێڕوانینیان بەرامبەر ئەو براندە خراپتر دەبێت.
ئەم داتایە خاڵێکی زۆر گرنگ لە داهاتووی مارکێتینگ دەخاتە ڕوو: پرسیارە ستراتیژییەکە چیتر ئەوە نییە کە «ئایا AI بەکاربهێنین؟»، بەڵکو پرسیارە هەرە گرنگەکە ئەوەیە: «ئەوەی AI دروستی دەکات، ئایا شایەنی ناوی براندەکەمانە؟»
ڕاستە ئێستا AI دەتوانێت وێنە، ڤیدیۆ، دەق و دەیان جۆری ناوەڕۆکی داهێنەرانە (Creative) بە خێراییەکی زۆر و بە تێچوویەکی کەم بەرهەم بهێنێت، بەڵام ئاسانبوونی بەرهەمهێنان بە مانای باشتربوونی ناوەڕۆکەکە نییە. بە پێچەوانەوە، کاتێک هەزاران براند بتوانن هەمان تەکنەلۆژیا بەکاربهێنن، خودی AI چیتر خاڵێکی جیاکەرەوە نییە.
ئەوەی جیاوازی دروست دەکات چییە؟ ئەوەی براندێک لەوی تر جیا دەکاتەوە؛ سەلیقە (Taste)، بڕیاردانی مرۆڤ (Human Judgment) و تێگەیشتنە لە کەلتوور و هەستی کڕیار. داهاتووی مارکێتینگ پێشبڕکێی ئەوە نییە کێ زیاتر AI بەکاردەهێنێت؛ بەڵکو پێشبڕکێی ئەوەیە کێ باشتر دەتوانێت بەرهەمی AI هەڵبسەنگێنێت، کەی ڕەتی بکاتەوە، و تەنها ئەوە هەڵبژێرێت کە بەتەواوی لەگەڵ ناسنامەی براندەکەیدا دەگونجێت.
بۆیە لە سەردەمی AIدا، یەکێک لە بەهاترین تواناکانی مارکێتەر لەوانەیە «نووسینی پرۆمپت - Prompt Writing» نەبێت، بەڵکو «سەلیقە - Taste» بێت. چونکە هەرچەندە AI دەتوانێت ناوەڕۆک دروست بکات، بەڵام هێشتا مرۆڤە کە دەبێت بڕیار بدات کام ناوەڕۆک شایەنی ناوی براندەکەیە.
(تێبینی: ڕێژەی ٤٧٪ تایبەتە بە داتای کڕیارانی سەنگافورە و نابێت وەک پێوەرێکی جیهانی لێک بدرێتەوە، بەڵام ئاماژەیەکی بەهێزە بۆ گۆڕانی ڕەفتاری کڕیار).
