دەمێ ژیرییا دەستکرد دزانیت تو تا چەند یێ ئامادەیی پارەی بدەی؛ مەترسییێن Surveillance Pricing
«هزر بکە؛ تو و کەسەکێ دی د هەمان دەم و هەمان فرۆشگەهـ دا ئێک بەرهەمی دکڕن، لێ هەر ئێک ژ هەوە بهایەکێ جودا دبینیت! نە ژبەر داشکاندنێ، بەلکو ژبەر کو AI دزانیت کێ یێ ئامادەیە پارەیێ زێدەتر بدەت.»
ئەڤە ئێکە ژ وان نیگەرانییێن مەزن کو ل گەل گەشەیا ب لەز یا (AI Pricing) و دیاردەیا بهادانانا چاڤدێریکری (Surveillance Pricing) د بازاڕی دا زێدەتر بەحس لێ دهێتە کرن. ل گۆرەی ڕاپۆرتەکا ئاژانسا (Associated Press)، بکارئینانا AI، گوهۆڕینا بەردەوام یا بهایان و بکارئینانا تابلۆیێن بهایێ دیجیتاڵی د فرۆشگەهان دا، پسیارێن مەزن ل سەر شەفافییەت و دادپەروەرییا بهای ل دەف کڕیاران دروست کرینە.
ئاریشە نە بتنێ لەزاتییا گوهۆڕینا بهایانە. نیگەرانییا ڕاستەقینە ئەڤەیە: ئەگەر داتایێن تایبەت یێن کڕیاری بهێنە بکارئینان بۆ هەلسەنگاندنا وێ یەکێ کو هەر تاکەک چەند شیان هەنە و یێ ئامادەیە پارەی بدەت، دێ چ ڕوودەت؟
ل ڤێرە جوداهییا ناسک یا د ناڤبەرا «بتایبەتکرن - Personalization» و «بهادانانا چاڤدێریکری - Surveillance Pricing» دەردکەڤیت. د یا ئێکێ دا، داتا دهێتە بکارئینان بۆ وێ یەکێ پێشنیارەکا گونجاوتر و باشتر ب تە بهێتە دان، لێ د یا دووێ دا، داتایێن تە دبنە ئامرازەک بۆ خەملاندنا شیانێن بەریکا تە و سەپاندنا بلندترین بهایێ گونجاو ل سەر تە.
وانە بۆ مارکێتەران چییە؟ ستراتیژییا Personalization بتنێ تا وێ خالێ بهای دروست دکەت کو باوەرییا کڕیاری ژ ناڤ نەبەت. کڕیار حەز ل پێشنیارێن تایبەت دکەت، لێ ئەگەر هەست بکەت براند داتایێن وی بۆ وێ یەکێ بکار دئینیت دا بزانیت «چەند پارەیێ زێدەتر دێ ژێ دەست کەڤیت»، ئەو داتایا کو دڤیا ئەزموونا کڕیاری باشتر بکەت، دێ بیتە ئەگەرێ ژناڤچوونا ئێکجاری یا باوەرییێ.
د سەردەمێ AI دا، پسیارا ستراتیژی نە بتنێ ئەڤەیە: «ب داتایێن کڕیاری چ دشێین بکەین؟»، بەلکو پسیارا هەرە گرنگ ئەڤەیە: «ب داتایێن کڕیاری چ نابیت بکەین؟». د دوماهییێ دا، ڕەنگە AI بشێت باشترین بها بۆ زێدەکرنا قازانجی ببنیت؛ لێ ئەگەر ئەو بها ببیتە ئەگەرێ ژدەستدانا باوەرییا کڕیاری، ئەڤجا براندێ باجەکا گەلەک قورستر دایە.
