قۆناغەکا نوی د ڕیکلامێ دا؛ Runway پرۆسەیا داهێنانێ (Creative) ب خۆکار دکەت، کو د ناڤ دا AI ژ داتایان فێر دبیت بۆ بەرهەمئینانا کەمپینێن سەرکەفتیتر
هەتا نۆکە ژیرییا دەستکرد (AI) د مارکێتینگێ دا پتر وەکی ئامرازەک بۆ نڤیسینا دەقان، یان دروستکرنا وێنە و ڤیدیۆیان هاتییە بکارئینان. لێ کۆمپانییا Runway ب ناساندنا پلاتفۆرمێ نوی یێ "Runway Ads" دڤێت ڤی سنووری دەرباز بکەت. پلاتفۆرم سیستەمەکێ ژیرییا دەستکردە کو بۆ بڕێڤەبرنا تەمام یا بەشێ داهێنانێ (Creative) د کەمپینێن فرۆتنێ (Performance Marketing) دا هاتییە دروستکرن؛ ئانکو AI ڕیکلامێ دروست دکەت، بەلاڤ دکەت، ئەنجامێن وێ دپیڤیت، و پاشان ل سەر بنەمایێ وان ئەنجامان ڤێرژنێن باشتر و نویتر بەرهەم دئینیت.
شێوازێ کارکرنا سیستەمی ب وی ئاوایی یە کو دەستپێکێ براند ئەکاونتێن خۆ یێن ڕیکلامێ ل Meta، Google و TikTok ب پلاتفۆرمی ڤە گرێ ددەن و ناسنامەیا براندێ خۆ (Brand Kit) ددنێ. پاشان، سیستەم مفا ژ ڕیکلامێن بەرێ، وێنەیێ بەرهەمان و ڕێنمایێن براندی دبینیت بۆ دروستکرنا دەهان ڤێرژنێن نوی یێن ڤیدیۆ و وێنەیان. بۆ نموونە، ل شوینا دووبارەکرنا ئێک ڕیکلاما ڤیدیۆیی یا سەرکەفتی، سیستەم دەهان جۆرێن جودا ژێ دروست دکەت ب گوهۆڕینا دەستپێکا ڤیدیۆیێ (Hook)، بینەر (Audience)، فۆرمات، و پەیاما کڕینێ (Call to Action)، هەڤدەم قەبارەیێ ڤیدیۆیان ژی ل گۆرەی جهێ بەلاڤکرنا وان دگوهۆڕیت. ئێکەکا دی ژ شیانێن وێ، گونجاندنا ناڤخۆیی یە (Localization)؛ ئانکو ئەگەر کەمپینەک ل چەند وەلاتان بهێتە بەلاڤکرن، سیستەم خۆکارانە دەقێ سەر شاشەیێ، وێنەیێ بەرهەمی و دەنگی (Voiceover) ل گۆرەی بازاڕێن جودا دگوهۆڕیت بێی کو ژ یاسایێن دەنگێ براندی دەربکەڤیت.
قۆناغا هەرە سەرنجڕاکێش یا پلاتفۆرمی پشتی پەسەندکرنا ڕیکلامان ژ لایێ مرۆڤی ڤە یە. سیستەم ڕاستەوخۆ ڕیکلامان بۆ پلاتفۆرمان دفرێکت و پاشان داتایێن ئەنجامان (Performance) وەردگریتەڤە. ل ڤێرێ بازنەیەکا بەردەوام (دروستکرن، پەسەندکرن، بەلاڤکرن، پێڤانکرن، فێربوون، و دروستکرنا ڤێرژنێ نوی) دەست پێدکەت. ئەگەر سیستەم تێبینی بکەت کو جۆرەکێ دیارکری یێ ڤیدیۆیێ خەرجییەکا باشتر هەیە، خولا بهێت یا ڕیکلامان ل سەر وی بنەمایی دروست دکەت کو پترترین سەرکەفتن هەبووینە. Runway ب خۆ ئەڤ ژێرخانە بۆ کەمپینێن خۆ ل Meta و TikTok تاقیکرییە و ڕاگەهاندیە کو د دەمەکی کورت دا هژمارا ڕیکلامێن حەفتیانە ژ ٧٧ـێ بۆ نێزیکی ٩٠٠ زێدەکرییە، قازانجا خەرجییا ڕیکلامێ (ROAS) دوو هێندە بوویە، و تێچوویێ ب دەستڤەئینانا هەر بەشداربوویەکی ٤١٪ داکەفتییە.
ئەڤ پێشهاتە گوهۆڕینەکا بنەڕەتی د کارێ تیمێن داهێنانێ (Creative Team) دا دروست دکەت. ل شوینا کو تیم ب دەستی دەهان ڤێرژنێن جودا، گوهۆڕینا قەبارە و وەرگێڕانێ ئەنجام بدەن کو دەم و تێچوویەکێ زۆر پێدڤی یە، بتنێ ستراتیژی و سنوورێن براندی دیار دکەن و کارێ دروستکرن و تاقیکرنێ ب ژیرییا دەستکرد یا جێبەجێکار (Agentic AI) دسپێرن. هەرچەندە بڕیارا دووماهییێ هێشتا د دەستێ مرۆڤی دا یە و سیستەمێ پەسەندکرنا مرۆڤی (Human Approval) بەردەستە، لێ پەیاما مەزن یا ڤێ هەوالێ ئەوە: ژیرییا دەستکرد ئێدی نە بتنێ بەرهەمئینەرێ ناڤەڕۆکێ یە، بەلکو خەریکە فێر دبیت کیژان جۆرێ ڕیکلامێ سەرکەفتییە و خۆکارانە ڤێرژنێن سەرکەفتی زێدەتر دکەت.
