ژ (SEO) بەرەڤ (GEO)؛ بۆچی Daily Mail خزمەتگوزارییەکا نوی یا مارکێتینگێ ڕادگەهینیت؟
«پێشتر مارکێتینگ بتنێ پێشبڕکێ بوو ل سەر وێ یەکێ کو د گووگڵێ دا یەکەم بی، لێ نۆکە براند دخوازن ژیرییا دەستکرد ناڤێ وان بینیت و پێشنیار بکەت!»
بۆ چەندین سالان، ئێک ژ مەزنترین ئارمانجێن مارکێتینگا دیجیتاڵی ئەڤە بوو کو دەمێ کڕیارەک د گووگڵێ (Google) دا ل تشتەکی دگەڕیت، براندا تە د ئەنجامێن دەسپێکێ دا دەربکەڤیت. لێ نۆکە ڕەفتارا لێگەڕیانا کڕیاران خەریکە ب تەمامی دگۆهۆڕیت. کڕیار دشێت ڕاستەوخۆ ژ (ChatGPT)، (Gemini) یان مۆدێلێن دی یێن ژیرییا دەستکرد بپرسیت: «باشترین بەرهەم بۆ من کیژە؟»
ل ڤێرە پسیارا ستراتیژی ئێدی نە ئەوە کا براندا تە د گووگڵێ دا یا ڕێزا چەندێ یە، بەلکو پسیارا نوی ئەڤەیە: ئەرێ ژیرییا دەستکرد براندا تە دنیاسیت، ناڤێ وێ دئینیت و بۆ کڕیاری پێشنیار دکەت؟
گۆهۆڕینا (GEO) بۆ بزنسەکێ نوی ڕۆژنامەیا (Daily Mail) یا بەریتانی نۆکە کار ل سەر گۆهۆڕینا ڤی ئاراستەی بۆ بزنسەکێ نوی دکەت. کۆمپانیا د نۆکە دا ١٢ بۆ ١٥ تاقیکرنێن تایبەت ب (GEO - Generative Engine Optimization) ل ئەمریکا، بەریتانیا و ئۆسترالیا بڕێڤە دبەت، و پلانا هەی کو د دەسپێکا سالا ٢٠٢٧ێ دا (AI Visibility) یان "دیاربوونا براندێ د ناڤ ژیرییا دەستکرد دا" بکەتە خزمەتگوزارییەکا فەرمی بۆ براندان.
شێوازێ کارێ وان ژی گەلەک یێ سەرنجڕاکێشە: سەرەتا (Daily Mail) دزانیت کڕیار چ جۆرە پسیار و فەرمانان (Prompt) ئاراستەی AI دکەن دەمێ ل بەرهەم یان خزمەتگوزارییەکێ دگەڕن. پاشان ب تێپەڕبوونا دەمی چاڤدێرییا وان پسیاران دکەت بۆ وێ یەکێ بزانیت AI پشت ب چ سەرچاوەیەکێ دگرێدیت و ناڤێ کیژ براندێ دئینیت. ئەگەر دەرفەت هەبیت، ناڤەڕۆکا تایبەت دروست دکەت بۆ زێدەکرنا چانسا دەرکەفتنا براندێ. د ئێک ژ تاقیکرنێن دەسپێکی دا بۆ براندەکا نەناس یا خزمەتگوزارییا دارایی، ڕێژەیا دەرکەفتنا براندێ د بەرسڤێن AI دا ژ نێزیکی ٥٠٪ بۆ ٧٥٪ بەرز بوویە.
کێشەیا مەزن یا (GEO) چییە؟ مەزنترین ئاستەنگ تا نۆکە ئەڤەیە: تو چاوا دزانی ئەو دەرکەفتنا د ناڤ AI دا بوویە ئەگەرێ فرۆشتنێ (Conversion)؟ ڕەنگە کڕیارەک ناڤێ براندا تە د (ChatGPT) دا ببینیت، لێ ڕاستەوخۆ کلیکێ ل سەر لینکێ نەکەت، بەلکو پشتی چەند دەمژمێرکان د گووگڵێ دا ل دویڤ بگەڕیت یان ڕاستەوخۆ بچیتە وێبسایتێ تە. لەوما گرێدانا ڤێ دەرکەفتنێ ب داهات و فرۆشتنێ ڤە هێشتا ئێک ژ مەزنترین ئالەنگارییێن (GEO) یە.
وانە بۆ مارکێتەران چییە؟ ئەڤ هەوالە بتنێ پەیوەندی ب (Daily Mail) ڤە نینە، بەلکو نیشانا گۆهۆڕینەکا زەبەلاحە د مارکێتینگا لێگەڕیانێ دا (Search Marketing). پێشتر خەما سەرەکی ئەڤە بوو: «ئەز چاوا براندا خۆ ل پەڕێ یەکەمێ یێ گووگڵێ دا دەرئێخم؟» لێ نۆکە پسیارەکا نوی دروست بوویە: «دەمێ AI بەرسڤا پسیارێن کڕیاری ددەت، دێ چاوا براندا من بیتە بەشەک ژ وێ بەرسڤێ؟»
د پاشەڕۆژا مارکێتینگێ دا، نە بتنێ (Search Ranking) دێ گرنگ بیت؛ بەلکو (AI Visibility) دێ بیتە مەیدانەکا نوی یا پێشبڕکێیا براندان. لێ پێدڤییە وێ ژی بزانین کو GEO هێشتا ل دەسپێکێ یە و چ براندەک نەشێت کۆنترۆلا تەمام ل سەر وێ یەکێ بکەت کو مۆدێلێن زمانەڤانی (LLMs) د هەمی بەرسڤان دا ناڤێ وان بینن. لەوما د ئەڤرۆ دا، GEO زێدەتر ستراتیژییەکە بۆ زێدەکرنا «ئەگەرا دەرکەفتنێ»، نە بەلێنەکا مسۆگەر بۆ دەرکەفتنێ.
