دەمێ AI دبیتە پشکەک ژ هونەر و ناسنامەیا براندی؛ چیرۆکا ژنویبوونا RÆBURN
«ژیرییا دەستکرد ئێدی نە بتنێ ئامرازەکە بۆ ب لەزکرنا کاری و کێمکرنا تێچووی؛ بەلکو بوویە ئامرازەکێ چیرۆکگێڕانێ و پشکەک ژ ناسنامەیا هونەرییا براندان!»
براندێ دیزاینێ یێ لەندەنی (RÆBURN) بۆ ڕاگەهاندنا قۆناغا ڤەگەڕیانا خۆ ل بن ناڤێ (RÆBURN, REBORN)، کەمپینەکا ڤیدیۆیی یا سەرنجڕاکێش بەلاڤ کرییە کو ب شێوەیەکێ گەلەک بەرفرەهـ پشت ب ژیرییا دەستکرد (AI) دبەستیت.
هزر و بیرۆکەیا کەمپینێ ژ چیرۆکەکا ڕاستەقینە یا (William Rankin) هاتییە وەرگرتن؛ فڕۆکەڤانەکێ کو د سالا ١٩٥٩ێ دا نەچار بوو د ناڤ جەرگێ عەورەکێ زریانی دا ژ فڕۆکەیا خۆ بازدەت و دەمەکێ درێژ د ناڤ ڕەشەبا و تەرزەی دا بمینیت، بەری کو ب سەلامەتی بگەهیتە سەر ئەردی. RÆBURN ئەڤ چیرۆکە کرییە مێتافۆرەک (خواستنەک) بۆ ژنویبوونا براندێ خۆ؛ ئانکو دەربازبوون د ناڤ نەئارامی و گوهۆڕینێن سەخت دا و دەرکەفتن ب ناسنامەیەکا نوی ڤە.
د بەرهەمئینانا ڤێ کەمپینێ دا، ستۆدیۆیا (Belief Studio) تێکەلەیەک ژ ئامراز و تەکنیکێن AI بکارئینایە. لێ خالا جودا ل ڤێرە ئەڤەیە کو AI بتنێ بۆ دروستکرنا دیمەنێن جوان نەهاتییە بکارئینان، بەلکو شێوازێ دیتنی (Visual Style) یێ خودێ ڤیدیۆیێ پشکەکە ژ پەیاما گوهۆڕین و ژنویبوونا براندی.
پەیام بۆ پاشەڕۆژا مارکێتینگێ چییە؟ ئەڤ کەمپینە نیشان ددەت کو AI ژ ئامرازەکێ سادە یێ بەرهەمئینانێ دهێتە گوهۆڕین بۆ ئامرازەکێ سەرەکی یێ چیرۆکگێڕانێ. لێ ل ڤێرە پسیارەکا ستراتیژی دروست دبیت: ئەگەر هەمی براند بشێن ب ڤان ئامرازان ڤیدیۆ و وێنەیێن سەرنجڕاکێش دروست بکەن، چ وەدکەت ژ ئێك جودا بن؟
بەرسڤ خودێ تەکنەلۆژیایا AI نینە؛ بەلکو هزر، چیرۆک و دیتنگەها هونەرییا مرۆڤی یە (Human Vision) کو ئاراستەیێ AI دکەت. د پاشەڕۆژا مارکێتینگێ دا، براندێ سەرکەفتی نە ئەوە یێ کو بتنێ دزانیت دڤێت AI بکاربینیت، بەلکو ئەوە یێ کو دزانیت بۆچی و چەوا د خزمەتا پەیاما خۆ دا بکار دئینیت.
