ئەپڵ (Apple) گورزەکا بێدەنگ ل کۆمپانیایێن ڕیکلامێ ددەت؛ iOS 27 پاشەڕۆژا مارکێتینگێ دگوهۆڕیت
«هەڤڕکییا پاشەڕۆژێ یا ڕیکلامێ نە بتنێ ل سەر سەرنجا کڕیاری یە، بەلکو ل سەر وێ یەکێ یە کا کی خاوەنێ پەیوەندییا ڕاستەوخۆیە ل گەل وان! ئەپڵ جارەکا دی یاسایێن یارییێ دگوهۆڕیت و ڤێ جارێ نە بتنێ Cookie، بەلکو جێگرەوەیان ژی دکەتە ئارمانج.»
کۆمپانییا ئەپڵ ل پشت پەردەیێ ئامیرێن خۆ ڤە گوهۆڕینەکا تەکنیکی ئەنجام ددەت کو دشێت بیڤەلەرزەکێ د بازاڕێ ڕیکلاما دیجیتاڵ دا دروست بکەت. د وەشانێن (iOS 27) و (Safari 27)ـێ دا، بزوێنەرێ WebKit دەست کرییە ب بلۆککرنا چەندین دۆمەینێن پەیوەست ب کۆمپانیا زەبەلاحێن تەکنەلۆژیایێ ڕیکلامێ (AdTech) و سیستمێن نیاسینا بکارئینەری، وەک The Trade Desk، LiveRamp، ID5 و چەندین دی.
بۆچی ئەڤە شۆڕشەکا نوی یە؟ پشتی کو بازاڕێ ڕیکلامێ هەست ب مەترسییا ژناڤچوونا (Third-party Cookies) کری، کۆمپانیایان دەست کرن ب دروستکرنا "ناسنامەیا جێگر" (Alternative ID) بۆ وێ یەکێ بشێن د مالپەڕێن جودا دا کڕیاران بناسن و ڕیکلامێن پەیوەندیدار ب وان ڤە نیشان بدەن. لێ ئەپڵ ب ڤێ گوهۆڕینا نوی، ڕاستەوخۆ وان تەکنەلۆژیایێن جێگر ژی بلۆک دکەت. کارتێکرن هندی کویر بوویە کو بۆ نموونە دۆمەینێ (adsrvr.org)ـێ سەر ب The Trade Desk هاتیە ڕاگرتن؛ ب ڤێ یەکێ نە بتنێ دویڤچوونا بکارئینەری (Tracking) سنووردار بوویە، بەلکو پرۆسەیا گەهاندنا خودێ ڕیکلامان ژی تووشی کێشەیان بوویە.
پارادۆکسا پاراستنا تایبەتمەندیێ (Privacy) ئەپڵ ڤێ گاڤێ ل بن ناڤێ پاراستنا تایبەتمەندییا بکارئینەران و ڕێگریکرن ل دویڤچوونا ناڤبەرا مالپەڕان (Cross-site Tracking) ئەنجام ددەت. هەرچەندە ئەڤە بۆ بکارئینەری هەوالەکێ باشە، لێ ئەنجامەکێ لاوەکی یێ مەترسیدار بۆ بازاڕێ کراوەیێ ئینتەرنێتێ (Open Web) هەیە. دەمێ ئارمانجکرن (Targeting)، دووبارە ئارمانجکرنەڤە (Retargeting) و پێڤانکرن (Measurement) د وێبێ دا زەحمەت دبیت، ڕیکلامکەر نەچار دبن پەنایێ بۆ وان ژینگەهێن داخستی ببەن کو بخۆ خاوەنێ داتایێ کڕیارینە، وەک: گووگل، مێتا، ئەمازۆن، واڵمارت و تەنانەت خودێ ئەپڵێ ژی!
پەیام بۆ مارکێتەران چییە؟ دنیایا ڕیکلاما دیجیتاڵ ب لەز ژ وی سیستمی دویر دکەڤیت کو پشت ب نیاسین و دویڤچوونا بکارئینەری دبەستیت ب ڕێیا لایەنێ سێیەم ڤە. ئێدی دەمێ وێ یەکێ یە براند وەبەرهێنانێ د داتایێ تایبەت ب خۆ دا (First-party Data) بکەن، وەک: داتایێ کڕینێ، سیستمێ CRM، پرۆگرامێن دلسۆزیێ (Loyalty Programs)، ئیمەیل و هەلسوکەفتێ کڕیاری ل سەر مالپەڕێ براندی بخۆ.
ئەگەر ستراتیژییا ڕیکلاما براندێ تە هێشتا پشت ب وێ یەکێ دبەستیت کو کڕیارەکی د هەمی جهێن ئینتەرنێتێ دا بناسی، هینگێ گوهۆڕینێن نوی یێن ئەپڵێ دشێن وێ ستراتیژییێ ب تەمامی بلەرزینن. هەڤڕکییا پاشەڕۆژێ ل سەر وێ یەکێ یە کا کی ب ڕاستەقینە خاوەنێ داتایێ کڕیارێن خۆیە و کی هێشتا چاڤەڕێی داتایێ کەسێن دی یە.
