هێرشا ڕاستەوخۆ یا دۆمینۆز بۆ سەر بیگمەک و هوپەر؛ بۆچی براند ل شوینا بێدەنگیێ، ناڤێ هەڤرکێن خۆ دکەنە چەکێ ڕیکلامێن خۆ؟
دۆمینۆز پیتزا (Domino's Pizza) د کەمپینەکا نوو دا، ڕێکەکا دژوارتر و سەرنجڕاکێشتر بۆ هەڤرکیێ هەلبژارتیە. ل شوینا وێ چەندێ کو ب تنێ بەحسێ پیتزا و بهایێ بەرهەمێن خۆ بکەت، بەرهەمێن ناسیار یێن بازاڕێ فاست فوودێ، وەکی Big Mac، Whopper و Crunchwrap Supreme، دئێخیتە د ناڤ کەمپینێ دا و خۆ ب ڕاستەوخۆ دگەل وان هەڤبەر دکەت. کەمپین ب شێوازەکێ کۆمێدی، موبالەغەکرن و هندەکێ تاری هاتیە دروستکرن.
بۆچی دۆمینۆز ناڤێ هەڤرکێن خۆ دئینیت؟ د مارکێتینگا ئاسایی دا، گەلەک ژ براندان بزاڤێ دکەن جوداهیا خۆ نیشان بدەن، لێ ب ڕاستەوخۆ ناڤێ هەڤرکان نائینن. دۆمینۆز ل ڤێرە ڕێکا بەروڤاژی دگریتە بەر. مەرەم ب تنێ ئەڤە نینە بێژیت «پیتزایا مە باشترە». براند بزاڤێ دکەت چارچووڤەیێ هەڤرکیێ بگوھۆڕیت. ئانکو کڕیار دۆمینۆزێ ب تنێ دگەل Pizza Hut یان Papa Johns هەڤبەر نەکەت، بەلکو دەمێ هزر د fast food دا دکەت، پیتزایا دۆمینۆزێ د هەمان لیستا هەلبژارتنێ دا دگەل burger، taco و بەرهەمێن زنجیرەیێن دی دابنیت. ئەڤە خالەکا ستراتیژی یا گرنگە. چونکی ئەگەر کڕیار دۆمینۆزێ ب تنێ وەکی «براندەکا پیتزایێ» ببینیت، هەڤرکایا وێ دێ ب بازاڕێ پیتزایێ هێتە سنووردارکرن. لێ ئەگەر بشێت خۆ وەکی بژاردەیەک بۆ هەر ژەمەکا ب لەز یا خارنێ بێخیتە د مێشکێ کڕیاری دا، بازاڕێ هەڤرکایا وێ دێ بەرفرەهتر بیت.
هەڤرکی ل سەر «بها»ی یە ئەڤ کەمپینە ژ ڤالاهیێ نەهاتیە. دۆمینۆز د سالا ٢٠٢٥ێ ژی دا کەمپینەک ب ڕێڤە بر کو ب شێوەیەکێ ڕاستەوخۆ بهایێ پارچەیەکا پیتزایا خۆ دگەل بەشەکێ بەرگەر هەڤبەر دکر. ئەو کەمپین بزاڤەک بوو بۆ هندێ کو د دەمەکێ دا کڕیار پتر هەستیارێ بهای بوو، دۆمینۆز خۆ وەکی بژاردەیەکا ب بها نیشان بدەت. کەمپینا نوو وێ ستراتیژیێ بەرفرەهتر دکەت. ب ڕامانەکا دی، پەیام ب تنێ: «پیتزایا مە ژ پیتزایا هەڤرکان باشترە» نینە. پتر نێزیکە ل: «بەری تو پارەیێ خۆ بۆ هەر fast food ـەکا دی خەرج بکی، مە ژی وەکی بژاردەیەک بەرچاڤ وەرگرە.»
ڕیکلاما هەڤبەرکری (Comparative Advertising) بۆچی کارتێکەر دکەڤیت؟ هەڤبەرکرنا ڕاستەوخۆ دشێت ئێک ئاریشەیا گرنگ یا مارکێتینگێ چارەسەر بکەت: کڕیار تە ب چ هەڤبەر دکەت؟ براند دشێت ب ئینانا ناڤێ هەڤرکان، خۆ بێخیتە د هەمان چارچووڤەیێ هزرا کڕیاری دا. دەمێ دۆمینۆز بەحسێ Big Mac یان Whopper دکەت، ب شێوەیەکێ نەڕاستەوخۆ دبێژیت: «دەمێ جارەکا دی تە بڕیار ل سەر خارنا ب لەز دا، مە ژی دگەل ڤان هەڤبەر بکە.» ژ لایێ positioning ڤە، ئەڤ چەندە یا گرنگە، چونکی براند خۆ ژ category یەکا تەنگ دەردئێخیت و دئێخیتە د ناڤ هەڤرکییەکا بەرفرەهتر دا.
لێ ئینانا ناڤێ هەڤرکان مەترسی ژی یا هەی ڕیکلاما هەڤبەرکری هەرتم ب قازانجێ وێ براندێ ب دوماهی ناهێت یا کو دەست پێ کری. دەمێ دۆمینۆز بەردەوام ناڤێ Big Mac و Whopper دئینیت، هەمان دەم ناڤ و بەرهەمێ هەڤرکێن خۆ ژی دئێخیتە بەرچاڤێ جەماوەری. ئەگەر پەیام نە یا ب هێز بیت، ئەگەرێ وێ یێ هەی کڕیار ل شوینا دۆمینۆزێ، پتر هزر د McDonald’s یان Burger King دا بکەت. لەوما ئینانا ناڤێ هەڤرکان ب تنێ نە ستراتیژی یە. پێدڤییە براند ئەگەرەکێ ڕوون و ئاشکرا هەبیت دا کو کڕیار پشتی هەڤبەرکرنێ وێ هەلبژێریت.
پەیاما مەزنتر یا کەمپینێ گرنگترین خالا ڤێ نۆچەیێ ب تنێ ئەڤە نینە کو دۆمینۆز ترانەیان ب Big Mac و Whopper دکەت. بابەتا مەزنتر ئەوە کو براند دشێت خۆ دیار بکەت کا د مێشکێ کڕیاری دا دگەل کێ هەڤرکیێ دکەت. دۆمینۆز بزاڤێ دکەت سنوورێ «پیتزایێ» بشکێنیت و بێژیت هەڤرکایا مە ب تنێ پیتزافرۆشێن دی نینن؛ هەر براندەکا کو کڕیار دشێت بۆ ژەمەکا ب لەز پارەی پێ بدەت، هەڤرکێ مە یە. ئەگەر ئەڤ positioning ـە د مێشکێ کڕیاری دا بجهـ ببیت، سەرکەفتنا کەمپینێ دێ ژ چەند view و like ـەکێ گەلەک مەزنتر بیت. لێ نۆکە هێشتا زوویە کو ئەم بێژین کەمپینێ ب ڕاستی ڕەفتارا کڕینێ یان market share یا دۆمینۆزێ گۆهڕیە. نۆچە ستراتیژیێ نیشان ددەت، نەکو هێشتا سەرکەفتنا دوماهییێ.