کۆمپانیای Universal Pictures Content Group مافی بەڵگەفیلمێکی کۆنسێرتی هاری ستایڵز بەدەستدەهێنێت
جۆن ویڵسنی دەرهێنەر سەرقاڵی تۆمارکردنی زنجیرە نمایشە مێژووییە ٣٠ کۆنسێرتییەکەی ئەو ئەستێرەیەی پۆپە لە هۆڵی Madison Square Garden، بۆ فیلمێکی درێژی نوێ کە بەرهەمهێنراوی هاوبەشی Peanut World Pictures و ستایڵزە.
کۆمپانیای Universal Pictures Content Group مافی تایبەت و جیهانیی بەڵگەفیلمێکی درێژی بەدەستهێناوە کە باس لە هاری ستایڵز، گۆرانیبێژی پۆپ دەکات لە ماوەی زنجیرە کۆنسێرتە بێوێنە ٣٠ نمایشییەکەیدا لە هۆڵی Madison Square Garden لە شاری نیویۆرک.
فیلمەکە لە دەرهێنانی جۆن ویڵسنـە، کە بە زنجیرە بەڵگەفیلمی (How To with John Wilson) و (The History of Concrete) لە کەناڵی HBO ناسراوە، و لەلایەن Universal Pictures Content Group، ستایڵز و Peanut World Pictures بە هاوبەشی بەرهەمهێنراوە. بەپێی زانیارییەکان، لێکۆڵینەوە لە نمایشکردنی فیلمەکە لە هۆڵەکانی سینەمادا لە ڕێگەی کۆمپانیای Universal دەکرێت، هەرچەندە مەرجەکانی دابەشکردن هێشتا یەکلایی نەکراونەتەوە و هیچ ڕێککەوتێکیش بۆ پێشاندانی دیاری نەکراوە.
بەپێی گۆڤاری Variety، وێنەگرتنی فیلمەکە لە مانگی ئابدا لە هۆڵەکە دەستیپێکردووە. فیلمە تەواوکراوەکە دیمەنی نمایشە ڕاستەوخۆکان لەگەڵ گرتەکانی پشت پەردەدا تێکەڵ دەکات کە تیشک دەخەنە سەر ستافی کارکردن و بینەران لە ماوەی بەڕێوەچوونی کۆنسێرتەکاندا.
زنجیرە کۆنسێرتەکەی Madison Square Garden، کە لە ٢٦ی ئابەوە تاوەکو ٣١ی تشرینی یەکەم بەردەوام بوو، بە گەورەترین زنجیرە نمایشی بەردەوام لە مێژووی ئەو هۆڵەدا دادەنرێت. لەو کۆنسێرتانەدا و لە دووەمین ساڵیادی کۆچی دوایی لیام پەیندا، بۆ یەکەم جار گۆرانییەکی بڵاونەکراوە بە ناوی «What Is Enough» بە شێوەیەکی ڕاستەوخۆ پێشکێش کرا.
ئەم زنجیرە کۆنسێرتە بەشێکە لە گەشتە هونەرییە جیهانییەکەی ستایڵز بە ناوی «Together, Together»، کە بۆ پشتگیریکردنە لە چوارەمین ئەلبوومی بە ناوی (Kiss All the Time. Disco, Occasionally). بڕیارە ئەو هونەرمەندە لە کۆتایی ئەمساڵدا چەند کۆنسێرتێک لە یاریگاکانی ئوسترالیا ساز بکات، پێش ئەوەی تاوەکو ساڵی ٢٠٢٧ گەشتە هونەرییەکەی لە ئەمریکای باکوور و ئەورووپا دەستپێبکاتەوە.
سەرچاوە: consequence.net
