ChatGPT ڕیکلامەکانی دەکاتە وێنەیی؛ ساتەکانی «دروستکردن بە AI» دەبێتە گۆڕەپانی نوێی مارکێتینگ
«لە Google کێبڕکێ لەسەر وشەیە، لە Instagram لەسەر سەرنجە؛ بەڵام کاتێک کڕیار بە زیرەکیی دەستکرد خەریکی خەیاڵکردن و نەخشەکێشانی ژیانێتی، براندەکەت لە کوێیە؟ ChatGPT خەریکە ئەم ساتە دەکاتە نوێترین دەرفەتی ڕیکلام.»
ChatGPT خەریکە هەنگاوێکی دیکەی گەورە بەرەو بوون بە پلاتفۆرمێکی زەبەلاحی ڕیکلام هەڵدەگرێت. کۆمپانیای OpenAI ڕایگەیاندووە کە لەم مانگەدا فۆرماتێکی نوێی ڕیکلامی وێنەیی تاقی دەکاتەوە، کە سەرەتا تەنها لە کاتی "دروستکردنی وێنە" بە ChatGPT دەردەکەون.
بۆ نموونە، خەیاڵ بکە داوا لە ChatGPT دەکەیت: "ژووری کارێکی مۆدێرنم بۆ دیزاین بکە کە مێزێکی دار، مۆنیتەرێکی گەورە و ڕووناکیی گەرم تێدا بێت." لە کاتێکدا پلاتفۆرمەکە وێنەکە دروست دەکات، ڕیکلامێکی وێنەیی دەردەکەوێت کە مۆبڵ، چرای ژوور یان بەرهەمێکی پەیوەندیدار پیشان دەدات. ئەمەش جیاوازییەکی زۆر گەورەی هەیە لەگەڵ ڕیکلامی نەریتی.
لە ڕیکلامی گەڕاندا (Search)، تۆ هەوڵ دەدەیت بپێویت کڕیار بەدوای چیدا دەگەڕێت. لە سۆشیاڵ میدیا، هەوڵ دەدەیت لەسەر بنەمای هەڵسوکەوتەکانی ڕیکلامی پێشان بدەیت. بەڵام لە AIـدا، بەکارهێنەر خۆی بە وردی و ئارەزووی خۆی دەڵێت چی دەوێت دروستی بکات. کاتێک ڕیکلامێکی پەیوەندیدار لە هەمان ساتدا پیشان دەدرێت، براندەکە ڕێک لەو چرکەساتەدا دەگاتە بەکارهێنەر کە خەریکی خەیاڵکردن، هەڵبژاردن یان پلاندانانە.
خاڵێکی زۆر هەستیار لێرەدا ئەوەیە کە OpenAI جەخت دەکاتەوە ڕیکلامەکان بە ڕوونی وەک "ڕیکلام" نیشان دەدرێن و جیا دەکرێنەوە لەو وێنەیەی ChatGPT دروستی دەکات. هەروەها کڕینی ڕیکلام کاریگەری لەسەر وەڵامە ئۆرگانییەکانی ChatGPT نابێت و پلاتفۆرمەکە بەهۆی پارەدانەوە بەرهەمێک ناکاتە وەڵامی باشتر. ئەمەش بۆ پاراستنی متمانەی ئەو ١.٢ ملیار بەکارهێنەرەیە کە هەفتانە سەردانی دەکەن.
گرنگیی ئەم هەواڵە بۆ مارکێتەرەکان تەنها وێنە ڕیکلامییەکان نییە. OpenAI هاوبەشییەکانی بۆ پێوانەکردنی سەرچاوەی کڕین (Attribution) فراوان کردووە بۆ ئەوەی بزانرێت ئایا بینینی ڕیکلامێک لە ChatGPT بووەتە هۆی کڕینی بەرهەمێک؟ بەم هەنگاوە، ژینگەی مارکێتینگ لە (Search و Social Media)ـەوە فراوانتر دەبێت بۆ (Conversation و Creation). گەشتی کڕیاریش دەگۆڕێت بۆ: نووسینی پرۆمپت (Prompt) بۆ وەرگرتنی ئەزموونی زیرەکیی دەستکرد، پاشان بینینی ڕیکلامی گونجاو، و لە کۆتاییدا بڕیاری کڕین.
