ChatGPT ڕیکلامێن خۆ دکەتە وێنەیی؛ دەمێن «دروستکرن ب AI» دبیتە گۆڕەپانا نوی یا مارکێتینگێ
ل Google هەڤڕکی ل سەر پەیڤانە، ل Instagram ل سەر سەرنجێ یە؛ لێ دەمێ کڕیار ب ژیرییا دەستکرد مژوولی خەیالکرن و نەخشەکێشانا ژیانا خۆ یە، براندێ تە ل کیڤە یە؟ ChatGPT خەریکە ڤی دەمی دکەتە نویترین دەرفەتا ڕیکلامێ.»
ChatGPT خەریکە گاڤەکا دی یا مەزن بەرەڤ بوون ب پلاتفۆرمەکا زەبەلاح یا ڕیکلامێ دهاڤێژیت. کۆمپانییا OpenAI ڕاگەهاندیە کو د ڤێ هەیڤێ دا فۆرماتەکێ نوی یێ ڕیکلاما وێنەیی تاقی دکەت، کو دەستپێکێ بتنێ د دەمێ "دروستکرنا وێنەی" ب ChatGPT دا دەردکەڤن.
بۆ نموونە، خەیال بکە داخوازێ ژ ChatGPT دکەی: "ژوورەکا کارێ مۆدێرن بۆ من دیزاین بکە کو مێزەکا دارین، مۆنیتەرەکا مەزن و ڕووناهییەکا گەرم تێدا هەبیت." د دەمێ کو پلاتفۆرمی وێنە دروست دکەت، ڕیکلامەکا وێنەیی دەردکەڤیت کو مۆبیلیات، چرایێ ژوورێ یان بەرهەمەکێ پەیوەندیدار نیشان ددەت. ئەڤە ژی جوداهییەکا گەلەک مەزن ل گەل ڕیکلاما کەڤنار هەیە.
د ڕیکلاما لێگەڕیانێ (Search) دا، تۆ بزاڤێ دکەی بپیڤی کڕیار ل دویڤ چ دگەڕیێت. د سۆشیال میدیایێ دا، بزاڤێ دکەی ل سەر بنەمایێ هەلسوکەفتان ڕیکلامی نیشان بدی. لێ د AIـێ دا، بکارئینەر ب خۆ ب هوورگاتی و حەزا خۆ دبێژیت دڤێت چ دروست بکەت. دەمێ ڕیکلامەکا پەیوەندیدار د هەمان دەم دا بهێتە نیشاندان، براند ڕێک د وێ چرکەساتێ دا دگەهیتە بکارئینەری کو مژوولی خەیالکرن، هەلبژارتن یان پلاندانانێ یە.
خالەکا گەلەک هەستیار ل ڤێرێ ئەوە کو OpenAI تەکەزیێ دکەت کو ڕیکلام ب زەلالی وەک "ڕیکلام" دهێنە نیشاندان و دهێنە جوداکرن ژ وی وێنەیێ ChatGPT دروست دکەت. هەروەسا کڕینا ڕیکلامێ کارتێکرنێ ل سەر بەرسڤێن ئۆرگانیک یێن ChatGPT ناکەت و پلاتفۆرم ب سەدەما پارەدانێ بەرهەمەکی ناکەتە بەرسڤەکا باشتر. ئەڤە ژی بۆ پاراستنا باوەرییا وان ١.٢ ملیار بکارئینەرانە کو حەفتیانە سەرەدانا وێ دکەن.
گرنگییا ڤێ هەوالێ بۆ مارکێتەران نە بتنێ وێنەیێن ڕیکلامی نە. OpenAI هەڤپشکییێن خۆ بۆ پێڤانکرنا ژێدەرا کڕینێ (Attribution) بەرفرەهـ کرینە بۆ وێ یەکێ بهێتە زانین ئەرێ دیتنا ڕیکلامەکێ ل ChatGPT بوویە سەدەما کڕینا بەرهەمەکی؟ ب ڤێ گاڤێ، ژینگەها مارکێتینگێ ژ (Search و Social Media)ـێ بەرفرەهتر دبیت بۆ (Conversation و Creation). گەشتا کڕیاری ژی دگوهۆڕیت بۆ: نڤیسینا پرۆمپتی (Prompt) بۆ وەرگرتنا ئەزموونا ژیرییا دەستکرد، پاشان دیتنا ڕیکلاما گونجای، و د دووماهییێ دا بڕیارا کڕینێ.
