پێشکەفتنا ب لەز یا ژیرییا دەستکرد (AI) ل شوینا کو هەڤڕکییێن نوی پەیدا بکەت، سەردەستی و هەژموونا گۆگل، مێتا و ئەمازۆنێ د بازاڕێ ڕیکلامێن دیجیتاڵی دا چەندین جاران زێدەتر دکەت
د دەمەکێ دا کو دهاتە پێشبینیکرن پێشکەفتنا ژیرییا دەستکرد دەرفەتێ بۆ هەڤڕکێن بچویک و نوی پەیدا بکەت، لێ داتایێن نوی بەروڤاژی ڤێ یەکێ نیشان ددەن؛ ژیرییا دەستکرد خەریکە سەردەستییا کۆمپانییێن مەزن یێن وەکی گۆگل، مێتا و ئەمازۆنێ د بازاڕێ ڕیکلامان دا ب هێزتر لێ دکەت.
ل گۆرەی شرۆڤەیەکا مالپەڕێ دیجی دەی (Digiday) کو پشتا خۆ ب ئامارێن مادیسۆن ئەند وۆڵ (Madison & Wall) گرێدایە، د سالا ٢٠٢٥ێ دا ڤان هەر سێ کۆمپانییان ب هەڤ ڕا ٥٦٪ ژ هەمی داهاتێ بازاڕێ ڕیکلامێن ئەمریکایێ (ژبلی ڕیکلامێن سیاسی) کۆنترۆڵ کرینە، د دەمەکێ دا کو ئەڤ ڕێژەیە د سالا ٢٠٢٤ێ دا بتنێ ٥٣٪ بوو.
د وێ دەمێ دا پشکا گۆگل د بازاڕی دا ژ ٢٨٪ بەرەڤ ٢٩٪، مێتا ژ ١٧٪ بەرەڤ ١٩٪ و ئەمازۆن ژی ژ ٨٪ بەرەڤ ٩٪ بلند بوویە. د بەرامبەر دا، پشکا هەمی کۆمپانی و پلاتفۆرمێن دی ب هەڤ ڕا ژ ٤٧٪ بۆ ٤٣٪ داکەتییە. لێ پسیار ئەڤەیە، ڕۆلێ ژیرییا دەستکرد د ڤێ گوهۆڕینێ دا چییە؟
هەر سێ پلاتفۆرم ب لەز بەرەڤ بکارئینانا سیستەمێن خۆکار (ئۆتۆماتیکی) ڤە د برێڤەبرنا ڕیکلامان دا پێنگاڤان دهاڤێژن. بۆ نموونە، گۆگل ب ڕێکا Performance Max و AI Max، هەروەسا مێتا ب ڕێکا Advantage+ ڤە، پشکەکا مەزن یا ئەرکێن وەکی دیارکرنا ئارمانجێ، جهێ نیشاندانا ڕیکلامێ، دانانا بهای و دابەشکرنا بودجەی ددەنە دەستێ ئەلگۆریتم و ژیرییا دەستکرد.
پێشبینییێن مادیسۆن ئەند وۆڵ نیشان ددەن کو د سالا ٢٠٢٦ێ دا، نێزیکی ١٢٪ ژ خەرجییێن ڕیکلامان ل ئەمریکا دێ ب ڕێکا کەمپینێن ئۆتۆماتیک یان ژیرییا دەستکرد ڤە هێنە برێڤەبرن، کو ئەڤە ژی ل گۆرەی ڕێژەیا ٢٪ یا سالا ٢٠٢٣ێ گەشەکرنەکا مەزنە و دهێتە چاڤەڕێکرن کو هەتا سالا ٢٠٣٠ێ بگەهیتە ٢٧٪ ژ هەمی بازاڕی.
ئەڤ مەیلا بەرەڤ ئۆتۆماتیکبوونێ ڤە، خزمەتەکا مەزن بۆ پلاتفۆرمێن مەزن دکەت. هەر کو خەرجی پتر ب ڕێکا سیستەمێن ئۆتۆماتیک ڤە بهێتە کرن، پلاتفۆرم دێ داتایێن پتر بۆ پێشخستنا ئەلگۆریتمێن خۆ کۆم کەن. دەمێ کو سیستەم ئەنجامێن باشتر ب دەست ڤە دئینن، ڕیکلامکار نەچار دبن بودجەیەکا پتر تەرخان بکەن. ب ڤی ئاوایی خەلەکەک چێدبیت کو هێزا ڤان کۆمپانییان قۆرخ دکەت، ب ئاوایەکی کو دهێتە پێشبینیکرن پشکا وان د سالا ٢٠٢٦ێ دا بگەهیتە ٥٨٪ و د سالێن پاشتر ژی دا بەردەوام بلند ببیت.
بۆ شارەزایێن بواری مارکێتینگێ، ئەڤە بتنێ گوهۆڕینەکا تەکنەلۆژی یا سادە نینە. دەمێ کو ژیرییا دەستکرد ب خۆ بڕیارێ بدەت کا بودجە ل کیڤە بهێتە خەرجکرن، کیژان بکارئینەر ببیتە ئارمانج و کیژان ڕیکلام بهێتە نیشاندان، پشکەکا مەزن یا دەستهەلات و کۆنترۆلا کەمپینان ژ دەستێ ڕیکلامکاری دچیتە بۆ پلاتفۆرمان.
ئەڤ یەکە ژی پسیارەکا جدی ل سەر شەفافییەتێ دروست دکەت: ڕیکلامکار دێ چەوا پشتڕاست بیت کو ئەلگۆریتم بودجەی ب باشترین ئاوای و د بەرژەوەندییا وی دا خەرج دکەت، و نە بتنێ ب ئاوایەکی کو ئاماران د خزمەتا بەرژەوەندییا پلاتفۆرمێ ب خۆ دا باشتر نیشان بدەت؟
د ئەنجام دا، ژیرییا دەستکرد د بازاڕێ ڕیکلامان دا نە بتنێ ئامرازەکێ نوی یە، بەلکو نەخشەیێ دابەشبوونا هێز و سەرمایەی ژ بنەڕەت ڤە دگوهۆڕیت. ئەگەر ئەڤ ڕەوشە ب ڤی ڕەنگی بەردەوام بیت، ل شوینا کو قۆرخکارییا پلاتفۆرمێن مەزن تێک بشکێنیت، دێ گۆگل، مێتا و ئەمازۆنێ ژ بەرێ سەردەستتر و ب هێزتر لێ کەت.
