بودجەیێ ڕیکلامێ بەرەڤ AI Search ڤە دچیت؛ ٨٩٪ ژ ئاژانسان زێدەبوونا خەرجییێن خۆ پشتڕاست دکەن
شێوازێ لێگەڕیانا خەلکی د ئینتەرنێتێ دا بەرەڤ گوهۆڕینێ ڤە دچیت، بودجەیێ ڕیکلامێ ژی ڕێک ل دویڤ وێ گوهۆڕینێ دچیت. ڕاپۆرتەکا نوی یا پلاتفۆرمێ Digiday بۆ سالا ٢٠٢٦ێ نیشان ددەت کو ٨٩٪ ژ ئاژانسێن میدیایێ پشتڕاست کرینە کو کڕیارێن وان خەرجییێن خۆ د بوارێ لێگەڕیانا ژیرییا دەستکرد (AI Search) دا زێدە کرینە. ب ڤێ یەکێ ئەڤ بوارە مل ب ملێ (Streaming Video) و (Connected TV) بوویە ئێکەمین جهـ بۆ وەبەرهێنانا ڕیکلامێ. د بەرامبەر دا، ٦٠٪ ژ ئاژانسان کێمبوونا بودجەی د میدیایێن کەڤن (Broadcast Media) و ڕیکلاما دەرڤە (Out-of-Home) دا دیتینە.
لێ بۆچی AI Search ژ نشکەکێ ڤە ئەڤ هەمی سەرنجە ڕاکێشایە؟ بەرسڤ د گوهۆڕینا شێوازێ پسیارکرنا کڕیاری دا یە. بەرێ ئەگەر کەسەکی بڤیابا لاپتۆپەکێ بکڕیت، ل Google پەیڤێن پچڕپچڕ دنڤیسین: "باشترین لاپتۆپ بۆ کاری"، پاشان دڤیا ب خۆ چەندین لینکان ڤەکەت و هەڤبەرکرنێ د ناڤبەرا وان دا بکەت. لێ نۆکە د AI Search دا دشێت بێژیت: "لاپتۆپەکێ بۆ دیزاینێ دڤێت، پاترییا وێ یا بهێز بیت و بهایێ وێ ژ ١٥٠٠ دۆلاران زێدەتر نەبیت؛ سێ هەلبژاردەیێن باش بۆ من پێشنیار بکە." ل ڤێرێ، AI ڕاستەوخۆ بەرسڤێ ددەت و هەلبژاردەیان هەڤبەر دکەت.
ژ ڤێرێ گوهۆڕینا مەزن بۆ مارکێتینگێ دەست پێدکەت. د ڕابردووی دا، هەڤڕکییا براندان ل سەر دەرکەفتنا د ڕێزبەندییا ئێکێ یا Google دا بوو، لەوما باشترکرنا بزوێنەرێ لێگەڕیانێ (SEO) و ڕیکلاما لێگەڕیانێ (Search Ads) گەلەک د گرنگ بوون. لێ نۆکە پسیار گوهۆڕییە بۆ وێ یەکێ: دەمێ کڕیار پسیارێ ژ AI دکەت، ئەرێ براندێ تە د بەرسڤێ دا دەردکەڤیت؟ ئەڤێ یەکێ ژی وەکرییە کو ستراتیژییێن (GEO) و (AEO) — ئانکو باشترکرنا ناڤەڕۆکێ بۆ بزوێنەرێن زیرەک — ببنە جهێ سەرنجێ. گەشتا کڕیاری ژی (Customer Journey) کورت بوویە؛ ل شوینا "لێگەڕیان ← کلیک ← مالپەڕ ← هەڤبەرکرن ← کڕین"، پرۆسە بوویە "پسیار ← پێشنیارا AI ← بڕیارا کڕینێ".
ئەڤ دیاردەیا کو ب (Zero-click Search) دهێتە نیاسین، وەکرییە کو بکارئینەر پێدڤی ب ڤەکرنا مالپەڕان نەمینیت بۆ وەرگرتنا بەرسڤێ. هەر لەوما ڕاپۆرتەکا دی یا Digiday ئاماژە ب وێ یەکێ دکەت کو ٣٧٪ ژ پسپۆرێن براند و ئاژانسان کێمبوونا ترافیکێ د قۆناغا دەستپێکێ یا لێگەڕیانێ (Upper-funnel) و ٢١٪ ژی کێمبوونا ترافیکێ د قۆناغا دووماهییێ (Lower-funnel) دا دیتینە ب سەدەما AI.
پەیاما مەزن یا ڤێ پێشهاتێ بۆ مارکێتەران یا زەلالە: هەڤڕکییا پاشەڕۆژێ نە بتنێ ل سەر وێ یەکێ یە کا کی ل Google د ڕێزا ئێکێ دا یە، بەلکو ل سەر وێ یەکێ یە کا کیژان براند دشێت ببیتە بەشەک ژ بەرسڤ و پێشنیارێن ژیرییا دەستکرد. بودجە بەرەڤ AI Search ڤە دچیت، چونکی سەرنجا کڕیاری ژی ل سەر وێرێ یە.
