Stratejiya nû ya Meta eşkere bû: Ji platformeke reklamkirinê ber bi dabînkerê sîstema jîriya çêkirî (AI) ve bi mebesta birêvebirina guftûgo û firotina rasterast a markeyan
Kompanyaya Meta gaveke stratejîk a mezin di bazara jîriya çêkirî (AI) de diavêje. Vê carê armanc ne tenê zêdekirina çend taybetmendiyên nû bo nav Facebook, Instagram, an WhatsAppê ye; belkî Meta dixwaze teknolojiya xwe rasterast bibe nav sîstem û karûbarên kompanyayên din. Ji bo vê armancê jî, platformeke nû bi navê "Meta Enterprise Platform" ragihandiye, daku amûr û jêrxaneya xwe ya AI bixe ber destê kompanya û geşepêderan.
Guhertina arasteyê ber bi bazareke nû ve Heta niha, dema behsa Meta û jîriya çêkirî dihat kirin, zêdetir bala mirovan diçû ser bikaranîna wê ya di nav torên civakî de. Lê ev gava nû nîşan dide ku Meta dixwaze ji kompanyayekê ku tenê AI ji bo berhemên xwe bi kar tîne, bibe dabînkerê serekî yê teknolojiyê ji bo karsaziyên din. Wate di vê bazara nû de, kiriyarên Meta ne tenê bikarhênerên asayî ne, belkî xudê kompanya bi xwe ne.
Karsazî dê çawa sûdê jê bibînin? Yek ji beşên herî balkêş ên vê planê "Business AI" ye. Meta ev pêş xistiye daku karsazî bikaribin nûnerê zîrek (AI Agent) yê taybet bi xwe çêbikin; nûnerek ku dikare bi rengekî siruştî di proseya peywendîkirin û firotinê de serederiyê bi kiriyar re bike. Bo nimûne, markeyeke cilûbergan dikare xwedî AIyekê be ku dema kiriyar dipirse: "Kîjan çakêt ji bo min guncaw e?", bi lez berhema guncaw pêşniyar bike, bersiva pirsan bide û alîkariya proseya kirrînê bike. An xwaringehek dikare wê bi kar bîne ji bo pêşkêşkirina zanyariyan li ser menuyê û wergirtina daxwaziyan. Li vir mebest ne tenê "çatboteke" sade ye ku çend bersivên jiberkirî bide, belkî çêkirina alîkarekî hişmend e ku bi dirustî ji pêdiviya kiriyar têdigehe.
Bandora wê ya mezin li ser cîhana marketîngê Ev guhertin dê hemû hevkêşeya marketîngê biguhere. Heta niha, markeyan Meta tenê wekî kanaleke reklamkirinê bi kar aniye (pere didin ji bo nîşandana reklamê daku kiriyar were malpera wan). Lê ji niha û pê ve, Meta ne tenê cihê reklamê difroşe, belkî teknolojiyekê dide markeyan ku dikarin ji bo xizmetguzariya kiriyaran û firotina rasterast bi kar bînin. Berê geşta kiriyar (Customer Journey) bi vî rengî bû: Reklam -> Klîk -> Serdana malperê -> Lêgerîn -> Kirrîn. Lê AI Agent dikare vê proseyê gelek kurt bike; kiriyar rasterast daxwaza xwe dibêje û AI yekser berhemê difroşiyê. Ev jî tê wê wateyê ku "guftûgokirin" dê bibe beşekî gelek giringtir di proseya firotinê de.
Hevrikiyeke dijwar li gel kompanyayên mezin ên teknolojiyê Bi vê gavê, Meta rasterast derbasî nav hevrikiyeke tund dibe li gel kompanyayên wekî Microsoft, Google, û OpenAI, ku hemû di nav hewla wê yekê de ne ku jîriya çêkirî bikin sîstemeke encamder ne tenê bersivder. Herçend platforma Meta hêjî di qonaxa destpêkê de ye û em nikarin bibêjin kompanyayan hemû proseyên xwe dane destê AI, lê araste gelek zelal e.
Peyamek ji bo marketêran Heger ev pêşhat berdewam bin, erka marketêran di paşerojê de ne tenê çêkirina reklam û anîna trafîkê dibe. Belkî divê stratejiyê ji bo wê yekê jî daynin: Gelo AI ya markeyê çawa bi kiriyar re diaxive? Tonê dengê markeyê çawa diparêze? Û çawa dikare guftûgoyeke asayî bike firotineke serkeftî? Kurteya nûçeyê ev e: Jîriya çêkirî ber bi wê yekê ve diçe ku ji "amûreke çêkirina naverokê" bibe beşekî veneqetiyayî ji "çêkirina peywendiyê" ya di navbera marke û kiriyarên wê de.
