ستراتیژییا نوی یا مێتا (Meta) ئاشکرا بوو: ژ پلاتفۆرمەکا ڕیکلامکرنێ بۆ دابینکارێ سیستەمێ ژیرییا دەستکرد (AI) ب مەرەما بڕێڤەبرنا گۆتوبێژ و فرۆتنا ڕاستەوخۆ یا براندان
کۆمپانییا مێتا گاڤەکا ستراتیژی یا مەزن د بازاڕێ ژیرییا دەستکرد دا (AI) دهاڤێژیت. ئەڤجارە ئارمانج نە بتنێ زێدەکرنا چەند تایبەتمەندییێن نوی یە بۆ ناڤ فەیسبووک، ئینستاگرام، یان وەتسئەپ؛ بەلکو مێتا دڤێت تەکنەلۆژیایا خۆ ڕاستەوخۆ ببەتە ناڤ سیستەم و کارووبارێن کۆمپانییێن دی ڤە. د ڤی واری ژی دا، پلاتفۆرمەکا نوی ب ناڤێ "Meta Enterprise Platform" ڕاگەهاندیە، دا کو ئامراز و ژێرخانا AI یا خۆ بێخیتە بەر دەستێ کۆمپانیا و گەشەپێدەران.
گوهۆڕینا ئاراستەی بەرەڤ بازاڕەکێ نوی ڤە هەتا نۆکە، دەمێ بەحسێ مێتا و ژیرییا دەستکرد دهاتە کرن، سەرنج پتر ل سەر بکارئینانا وێ بوو د ناڤ تۆڕێن جڤاکی دا. لێ ئەڤ گاڤا نوی دیار دکەت کو مێتا دڤێت ژ کۆمپانیایەکێ کو بتنێ AI بۆ بەرهەمێن خۆ ب کار دئینیت، ببیتە دابینکارەکێ سەرەکی یێ تەکنەلۆژیایێ بۆ بزنسێن دی. ئانکو د ڤی بازاڕێ نوی دا، کڕیارێن مێتا نە بتنێ بکارئینەرێن ئاسایی نە، بەلکو ب خۆ کۆمپانیا نە.
بزنس دێ چاوا مفا ژێ بینن؟ ئێک ژ بەشێن هەرە سەرنجڕاکێش یێن ڤێ پلانێ "Business AI" یە. مێتا ئەڤە پێشخستییە دا کو بزنس بشێن بریکارێ زیرەک (AI Agent) یێ تایبەت ب خۆ دروست بکەن؛ بریکارەک کو دشێت ب ئاوایەکێ سروشتی د پرۆسەیا پەیوەندیکرن و فرۆتنێ دا سەرەدەریێ ل گەل کڕیاری بکەت. بۆ نموونە، براندەکا جلوبەرگان دشێت AIیەک هەبیت کو دەمێ کڕیار دپرسیت: "کیژان چاکێت بۆ من یێ گونجایە؟"، ب لەز بەرهەمێ گونجای پێشنیار بکەت، بەرسڤا پسیاران بدەت و هاریکارییا پرۆسەیا کڕینێ بکەت. یان خارنگەهەک دشێت ب کار بینیت بۆ پێدانا زانیارییان ل سەر مێنیویێ و وەرگرتنا داخازییان. ل ڤێرێ مەرەم نە بتنێ "چاتبۆتەکی" سادە یە کو چەند بەرسڤێن ژبەرکری بدەت، بەلکو دروستکرنا هاریکارەکی هۆشمەندە کو ب دروستی ل پێدڤییێن کڕیاری دگەهیت.
کارتێکرنا وێ یا مەزن ل سەر جیهانا مارکێتینگێ ئەڤ گوهۆڕینە دێ هەمی هەڤکێشەیا مارکێتینگێ گوهۆڕیت. هەتا نۆکە، براندان مێتا بتنێ وەکی کەناڵەکێ ڕیکلامکرنێ ب کار ئینایە (پارەی ددەن بۆ نیشاندانا ڕیکلامێ دا کو کڕیار بهێتە مالپەڕێ وان). لێ ژ نۆکە و پێدا، مێتا نە بتنێ جهێ ڕیکلامێ دفرۆشیت، بەلکو تەکنەلۆژیایەکێ ددەتە براندان کو دشێن بۆ خزمەتگوزارییا کڕیاران و فرۆتنا ڕاستەوخۆ ب کار بینن. پێشتر گەشتا کڕیاری (Customer Journey) ب ڤی ئاوایی بوو: ڕیکلام -> کلیک -> سەرەدانا مالپەڕی -> گەڕیان -> کڕین. لێ AI Agent دشێت ڤێ پرۆسەیێ گەلەک کورت بکەت؛ کڕیار ڕاستەوخۆ داخازییا خۆ دبێژیت و AI ئێکەسەر بەرهەمی دفرۆشیتێ. ئەڤە ژی ب وێ ڕامانێ دهێت کو "گۆتوبێژکرن" دێ بیتە بەشەکێ گەلەک گرنگتر د پرۆسەیا فرۆتنێ دا.
هەڤڕکییەکا دژوار ل گەل زەبەلاحێن تەکنەلۆژیایێ ب ڤێ گاڤێ، مێتا ڕاستەوخۆ دچیتە ململانێیەکا دژوار دا ل گەل کۆمپانیایێن وەکی Microsoft, Google, و OpenAI، کو هەمی دزاڤیێ دانە ژیرییا دەستکرد بکەنە سیستەمەکێ جێبەجێکار نە بتنێ بەرسڤدەر. هەرچەندە پلاتفۆرمێ مێتا هێشتا ل قۆناغا دەستپێکێ یە و ئەم نەشێین بێژین کۆمپانیایان هەمی پرۆسەیێن خۆ داینە دەستێ AI، لێ ئاراستە گەلەک یێ ڕوونە.
پەیامەک بۆ مارکێتەران ئەگەر ئەڤ پێشهاتە بەردەوام بن، ئەرکێ مارکێتەری د پاشەڕۆژێ دا نە بتنێ دروستکرنا ڕیکلامێ و ئینانا ترافیکێ دبیت. بەلکو پێدڤییە ستراتیژییێ بۆ وێ یەکێ ژی دابنیت: ئەرێ AI یا براندی دێ چاوا ئاخڤتنێ ل گەل کڕیاری کەت؟ تۆنێ دەنگێ براندی دێ چاوا پارێزیت؟ و دێ چاوا شێت گۆتوبێژەکا ئاسایی بکەتە فرۆتنەکا سەرکەفتی؟ کورتەیا هەوالێ ئەڤە یە: ژیرییا دەستکرد بەرەڤ وێ یەکێ ڤە دچیت کو ژ "ئامرازەکێ دروستکرنا ناڤەڕۆکێ" ببیێتە بەشەکێ ژێڤەنەبوو ژ "دروستکرنا پەیوەندییێ" د ناڤبەرا براند و کڕیارێن وێ دا.
