هەڤڕکییا پلاتفۆرمان دژوارتر بوو؛ مێتا (Meta) دەرگەهێ ڕیکلامکرنێ ل هەمبەر تیکتۆکێ (TikTok) دگریت
«ئەگەر بینەرێ تە ل سەر پلاتفۆرمێ کەسەکێ دی بیت، هینگێ ب تەمامی یێ تە نینە! بڕیارا نوی یا مێتایێ بۆ قەدەغەکرنا ڕیکلامێن تیکتۆکێ دیار کر کو خاوەندارییا داتایێ د سەردەمێ ئەڤرۆ دا ژ هەمی تشتان گرنگترە.»
مێتا (Meta) بڕیارەکا ستراتیژی و بێپێشینە دایە: ڕێیێ ب ڕیکلامێن کۆمپانییا (ByteDance) کو خاوەنا تیکتۆکێ (TikTok) یە نادەت ل سەر پلاتفۆرمێن فەیسبووک و ئینستاگرام بهێنە پەخشکرن. ئانکو تیکتۆک ئێدی نەشێت پارەی بدەتە مێتایێ بۆ وێ یەکێ بکارئینەران بەرەڤ خۆ ڤە بکێشیت. تەنانەت قەدەغەکرن هندەک ڕیکلامێن لایەنێ سێیەم ژی ب خۆ ڤە دگریت کو بکارئینەری ئاراستەی تیکتۆکێ دکەن.
مێتایێ ئەگەرێ خۆ ڤەنەشارتییە و دبێژیت: "ئەم نەچار نینین خزمەتگوزارییا ڕیکلامێ بدەینە هەڤڕکەکی کو دڤێت بکارئینەرێن مە ببەت." ئەڤە نیشان ددەت کو هەڤڕکییا پلاتفۆرمان دەربازی قۆناغەکا نوی بوویە. بۆ چەندین سالان هەڤڕکی بتنێ ل سەر دەم و سەرنجا بکارئینەری (Attention) بوو، لێ نۆکە بوویە شەڕێ کۆنترۆلکرنا گەهشتن ب بینەری (Audience). مێتا نە بتنێ جهێ ڕیکلامێ یە، بەلکو بخۆ خاوەنێ بینەرەکێ زەبەلاحە و بخۆ ژی دیار دکەت کا کی دشێت بگەهیتە وی بینەری.
پەیاما ڤێ بڕیارێ بۆ مارکێتەران گەلەک یا ڕوونە: ئەو (Audience)ـێ تە ل سەر پلاتفۆرمێ کۆمپانیایەکا دی دروست کری، ب کرێ یە و ب تەمامی یێ تە نینە. ئەڤرۆ تۆ دشێی ب ڕیکلامێ بگەهیە ب ملیۆنان کەسان، لێ سوبەهی پلاتفۆرم دشێت یاسایان بگوهۆڕیت و گەهشتنێ ل تە قەدەغە بکەت. لەوما گرنگییا داتایێ تایبەت ب براندی بخۆ (First-party Data) وەک: مالپەڕ، لیستا ئیمەیلی، ئەپلیکەیشن و کۆمەلگەها تایبەتا براندی (Community)، ژ جاران گەلەک زێدەتر بوویە.
ململانێیا مێتا و تیکتۆکێ پسیارەکا مەزن بۆ پاشەڕۆژا مارکێتینگێ هێلایە: د سەردەمەکێ دا کو چەند زەبەلاحێن تەکنەلۆژی کۆنترۆلا سەرنجا خەلکی کریە، ئەرێ هەڤڕکی بتنێ بۆ کێشانا بینەری یە، یان بۆ وێ یەکێ یە ڕێگریێ ل هەڤڕکێن خۆ بکەی دا کو نەشێن بگەهنە بینەرێ تە؟
