گوهۆڕینەکا مەترسیدار د مارکێتینگێ دا؛ ٣٨٪ ژ ڕێڤەبەران بڕیارێن ژیرییا دەستکرد بێی پێداچوونێ دپەسەندینن
«ژیرییا دەستکرد ژ ئامرازەکێ نڤیسین و دروستکرنا وێنان، هێدی هێدی دبیتە ڕێڤەبەرەکێ ستراتیژی! ئەرێ تۆ یێ بەرهەڤی چارەنڤیسێ براندێ خۆ بێخییە دەستێ ئەلگۆریتمەیەکێ بێی کو تۆ پێداچوونێ بۆ بکەی؟»
ڤەکۆلینەکا نوی یا (Bench Media) ل ئوسترالیا کو ل سەر زێدەتر ژ ٧٠ ڕێڤەبەرێن بلندا مارکێتینگێ هاتییە ئەنجامدان، ئامارەکا شۆکهێنەر ئاشکرا کرییە. ل گۆرەی ئەنجامان، ٤٨٪ ژ پشکداربوویان دبێژن بکارئینانا AI باوەری دایە وان د دەمێ بڕیاردانێ دا، و د دەمێ بڕیارێن مەترسیدار و زەحمەت دا ٤١٪ ژ وان AI ب ژێدەرەکێ گرنگ یێ بڕیاردانێ دبینن.
لێ خالا هەرە سەرنجڕاکێش ئەڤەیە: ٣٨٪ ژ وان ڕێڤەبەران د بەرهەڤن پێشنیارێن ستراتیژی یێن AI بێی چ پشکنین و پێداچوونەکا مرۆڤی (Human Review) پەسەند بکەن! تەنانەت دەمێ بابەت پەیوەندی ب دابەشکرنا بودجەی و هزرێن داهێنەرانە (Creative) ڤە هەبیت، ئەڤ ڕێژەیە بلند دبیت بۆ ٤٥٪.
ئەڤ داتایە نیشانا گوهۆڕینەکا گەلەک مەزنە. پسیار د بازاڕێ کاریدا ئێدی نە ئەوە «ئەرێ پێدڤییە ئەم AI بکاربینین؟»، بەلکو پسیارا ڕاستەقینە ئەڤەیە: «هەتا چ ڕادە دڤێت مافێ بڕیاردانێ بدەینە AI؟» ڕاستە ژیرییا دەستکرد دشێت ب لەزەکا مەزن داتایان شڕۆڤە بکەت و پێشنیاران دروست بکەت، لێ ئەڤە ب وێ مانایێ نینە هەردەم ڕاستییێ دبێژیت. بڕیارا ستراتیژی پێدڤی ب تێگەهشتنەکا کویر هەیە د بازاڕ، کەلتوور، دەروونناسییا مرۆڤی و هەستیارییێن براندی دا؛ ئەڤە ژی تشتن کو نابیت ب کۆرانە بکەڤنە دەستێ ئەلگۆریتمەیان.
د پاشەڕۆژا مارکێتینگێ دا، ژێهاتیبوون و شارەزایییا سەرەکی یا مارکێتەری د وێ یەکێ دا نابیت کا چەوا پرۆمپت (Prompt) بۆ AI دنڤیسیت؛ بەلکو د شیانا هەلسەنگاندن، پسیارکرن، و تەنانەت ڕەتکرنا پێشنیارێن AI دا دبیت دەمێ ل گەل ڕاستییێ نەگۆنجن.
(تێبینی: هەرچەندە ئەڤ ئامارە بتنێ نینەرایەتییا کۆمەکا ڕێڤەبەران ل ئوسترالیا دکەت و نابیت وەک پێڤەرەکێ جیهانی بهێتە دیتن، لێ زەنگەکا ئاگەهدارکرنێ یە بۆ وی ئاراستەیێ کو ئەڤ پیشەیە بەرەڤ دچیت).
