گۆگل چەند پێڤەرێن نوی بۆ پێڤانکرنا ڕیکلامان د وێبگەڕێ کڕۆم دا دئێخیتە کار دا کو مارکێتەر بزانن بکارئینەر چەند ڕیکلامان دبینن و کارتێکرنا وان ل سەر مالپەڕان چەوایە
گۆگل پێنگاڤەکا نوی هاڤێتییە بۆ پێڤانکرنا چەوانییا دەرکەفتنا ڕیکلامان ل سەر مالپەڕان و چەند پێڤەرێن نوی بۆ ڕاپۆرتا ئەزموونا بکارئینەرێ کڕۆم زیاد کرینە. ئەڤ یەکە ژی هاریکارییا بەلاڤکەر و شارەزایێن مارکێتینگێ دکەت تێگەهشتنەکا هوورتر هەبیت ل سەر وێ یەکێ کو بکارئینەر د دەمێ سەرەدانکرنا مالپەڕەکێ دا چەند ڕیکلامان دبینن و ئەو ڕیکلام چ کارتێکرنەکێ ل سەر ئەزموونا وان دکەن.
بۆ ڤێ مەرەمێ، گۆگل چار پێڤەرێن نوی خستینە ڕوو کو پێکدهێن ژ هەژمارا ڕیکلامان بۆ هەژمارتنا وان ڕیکلامێن ل سەر شاشێ دهێنە نیشاندان، چڕییا ڕیکلامان بۆ دیارکرنا وێ یەکێ کو چەند ژ ڕووبەرێ بەرچاڤ یێ شاشێ ب ڕیکلامان هاتییە داگیرکرن، ل گەل دو پێڤەرێن دی بۆ پێڤانکرنا وی بارێ گران یێ ڕیکلام دئێخنە سەر هێلا ئینتەرنێتێ و یەکەیا چارەسەرکرنا ناڤەندی یا ئامێری (CPU). خالا جوداکەر یا ڤێ نویاتییێ ئەوە کو داتا بتنێ ژ تاقیگەهەکا تەکنیکی نەهاتینە، بەلکو پشتا خۆ ب داتایێن ڕاستەقینە یێن بکارئینەرێن کڕۆم گرێ ددەن، ئەڤ یەکە ژی وەدکەت بەلاڤکەر و مارکێتەر بزانن بکارئینەر د ژینگەهەکا ڕاستەقینە دا چەوا سەرەدەرییێ ل گەل ڕیکلامان دکەت.
گرنگییا ڤێ گوهۆڕینێ د وێ یەکێ دایە کو د جیهانا مارکێتینگێ دا، زێدەبوونا ڕیکلامان هەردەم ب ڕامانا باشبوونا ئەنجامان ناهێت. ڕەنگە مالپەڕەک پڕ بیت ژ جهێن ڕیکلامێ، لێ ئەگەر ئەو ڕیکلام پشکەکا مەزن یا شاشێ داگیر بکەن یان ببنە ئەگەرێ خاڤبوونا مالپەڕی، بێگومان دێ ئەزموونا بکارئینەری خرابتر کەن. ژ لایەکێ دی ڤە، ئەڤ پێڤەرە پێزانینێن پتر ددەنە ڕیکلامکاران بۆ هەلسەنگاندنا جهێ ڕیکلامێن وان. ئانکو ل شوینا کو بتنێ پشتا خۆ ب پێڤەرێن بەرچاڤ یێن وەکی کلیک، دیتن یان تێچوویێ هزار دیتنان (CPM) گرێ بدەن، دشێن ژینگەها نیشاندانا ڕیکلامێ ژی بخوینن و بزانن کا ڕیکلاما وان د مالپەڕەکێ قەرەبالغ دا دهێتە نیشاندان، یان د جهەکێ دایە کو ب تەمامی سەرنجا بکارئینەری لێ کۆم بوویە.
هەرچەندە گۆگل ئاماژە ب وێ یەکێ کرییە کو ئەڤ پێڤەرە هەتا نۆکە د قۆناغا تاقیکرنێ دا نە و هێشتا نابیت ئێکسەر وەکی پێڤەرەکێ دووماهییێ بۆ هەلسەنگاندنا ڕیکلامان ل وان بهێتە نێڕین، لێ ئاراستە گەلەک ئاشکرایە. شێوازێ هەلسەنگاندنا ڕیکلامان خەریکە گوهۆڕین ب سەر دا دهێت و پسیار ئێدی نە بتنێ ئەوە کا چەند کەسان ڕیکلام دیتینە، بەلکو بەرەڤ پسیارەکا کوورتر دچیت کو ئەو ژی ئەڤەیە؛ د چ جۆرە ژینگەهـ و ئەزموونەکێ دا ڕیکلام دیتینە.
